Jose Simms, 29 ára Bandaríkjamaður, er eftirlýstur af lögregluyfirvöldum í Connecticut í Bandaríkjunum. Þetta væri vart í frásögur færandi nema fyrir þær sakir að Jose hefur lofað að gefa sig fram ef Facebook-færsla lögreglu, þar sem lýst er eftir honum, fær 15 þúsund læk.

Þegar þetta er skrifað er Facebook-færslan að vísu komin með rúmlega 20 þúsund læk, en enn sem komið er hefur Jose ekki gefið sig fram.

Lögreglumaður komst í samband við Jose í gegnum Facebook og úr varð að þeir gerðu með sér samkomulag. Jose sagðist ætla að koma á lögreglustöðina ef Facebook-færslan fengi 20 þúsund læk en lögreglumaðurinn vildi að hann kæmi ef færslan fengi 10 þúsund læk. Þeir ákváðu að fara milliveginn.

Jose er eftirlýstur vegna nokkurra brota, meðal annars vegna óspekta á almannafæri, en hann mætti ekki þegar mál hans átti að fara fyrir dóm á dögunum. Talið er að hann haldi sig í New York.

Málið hefur vakið nokkra athygli og sitt sýnist hverjum um þá aðferð lögreglu að gera beiðni Simms opinbera. Þannig segir Maki Haberfeld, sérfræðingur í siðfræði við John Jay College of Criminal Justice, að Simms sé ósköp einfaldlega að spila með lögreglu og fjölmiðla. Lögreglan eigi ekki að semja eins og þarna var gert.