Pólitískur rétttrúnaður er ástæðan fyrir að ekki hefur verið tekist á við kúgun á kristnu fólki. Kristið fólk er „lang ofsóttasti“ trúarhópurinn í heiminum og upplifir nú það sem jafna má við þjóðarmorð í sumum heimshlutum. Kristnir hafa verið hraktir á flótta frá Miðausturlöndum og hugsanlega mun það leiða til þess að kristinni trú verður útrýmt á svæðum þar sem „dýpstu rætur hennar liggja“.

Þetta kemur fram í nýrri skýrslu sem var unnin fyrir breska Utanríkisráðuneytið. Daily Mail skýrir frá þessu. Fram kemur að í skýrslunni komi fram að sannanir séu fyrir að ofsóknir á hendur kristnu fólki sé verri nú en nokkru sinni áður. Jeremy Hunt, utanríkisráðherra, segir að „pólitískur rétttrúnaður“ sé ástæðan fyrir að ekki hefur tekist að takast á við þá kúgun sem kristið fólk sætir en hann kallar þetta „gleymdu ofsóknirnar“.

Hunt segir að hann muni nota áhrif Breta á alþjóðavettvangi til að vernda kristið fólk sem sætir árásum vegna trúar sinnar. Hann viðurkennir einnig að vandanum hafi stundum verið afneitað vegna „óþarfa áhyggja“ að það að takast á við vandann muni verða túlkað sem nýlendustefna.

Samkvæmt skýrslunni er kristið fólk „áreitt“ í fleiri ríkjum en fólk af öðrum trúarbrögðum. Þetta á sérstaklega við í löndum þar sem íslamstrú er stærst en þannig er staðan í mörgum ríkjum í Miðausturlöndum og Norður-Afríku. 245 milljónir kristinna manna eru sagðir sæta áreiti og ofsóknum í 50 löndum og fjölgi þeim um 30 milljónir á ári.