Með því að nota einfalda öndunartækni á að vera hægt að sofna á innan við einni mínútu. Þessi tækni, nefnd 4-7-8, slekkur á stressviðbrögðum líkamans og gerir fólki þannig auðveldara fyrir að sofna. Það eina sem þarf að gera er að anda og það gerum við nú hvort sem er.

Aðferðinni hefur verið mikið hampað af jóga- og hugleiðslukennurum og er sögð vera náttúruleg aðferð til að svæfa taugakerfið en ólíkt lyfjum, sem virka oft betur í fyrstu en þegar fram líða stundir, þá batni áhrifin af þessari aðferð með aukinni notkun hennar. Aðferðin hentar að sögn einnig vel til að slaka á.

Það er best að liggja þegar kemur að því að nota aðferðina. Fyrsta skrefið er að setja tungubroddinn upp í efri góminn, alveg upp við framtennurnar. Þar á tungan að vera allan tímann en það krefst ákveðinnar æfingar að halda henni kyrri þegar andað er.

Því næst eru eftirfarandi skref tekin í einni öndunarhringrás:

Opnaðu munninn. Gefðu snöggt hljóð frá þér og andaðu aðeins út um munninn.

Lokaðu munninum, dragðu andann hljóðlega að þér í gegnum nefið á meðan þú telur upp að fjórum í huganum.

Haltu andanum niðri í 10 sekúndur.

Gefðu aftur snöggt hljóð frá þér og andaðu út um munninn í átta sekúndur.

Þegar þú dregur andann aftur að þér hefst ný hringrás öndunar. Endurtaktu þetta fjórum sinnum.