Við vissar aðstæður getur það verið vandræðalegt en staðreyndin er sú að ekkert okkar kemst hjá því að leysa vind. En hversu of við leysum vind og hvort sérstaklega vond lykt fylgi er að einhverju leyti undir okkur sjálfum komið.
Lisa Ganjhu meltingarsérfræðingur deildi með lesendum Mens Health-tímaritsins ástæðum þess að við leysum vind oftar en góðu hófi gegnir. Mataræði leikur stórt hlutverk og segir Lisa að þeir sem drekka mikið gos og drekka vökva í gegnum rör séu líklegri en aðrir til að leysa vind. Sætindi og gervisykur, sem líkaminn á erfitt með að melta, hefur einnig sitt að segja.
Hollt mataræði sem inniheldur til dæmis kál, rósakál og brokkólí getur einnig haft áhrif enda eiga sumir erfitt með að melta þessar tegundir grænmetis. Mjólkurvörur eru einnig taldar hafa slæm áhrif á vindgang; sérstaklega hjá þeim sem eru með mjólkuróþol. Loks bendir Lisa á að kvíði og stress geti leitt til vindverkja.
