Forsvarsmenn Houston Chronicle, eins stærsta dagblaðs Bandaríkjanna, eru með eigin blaðamann til rannsóknar vegna gruns um að nafnlausir heimildarmenn sem hann vitnaði til í umfjöllunum sínum séu ekki til.
Blaðamaðurinn sem um ræðir heitir Mike Ward og hefur hann nú látið af störfum. Hann á langan feril að baki og hafði hann starfað fyrir blaðið síðan árið 2014.
Það var Nancy Barnes, aðalritstjóri Houston Chronicle, sem greindi lesendum blaðsins frá þessu. Ábending kom frá samstarfsmanni Wards sem lýsti yfir áhyggjum sínum af starfsháttum hans. Sjálfur hefur Ward neitað að hafa skáldað heimildarmenn en ákvað að láta af störfum engu að síður.
Nancy segir að Houston Chronicle hafi ráðið reyndan rannsóknarblaðamann til starfa og mun hann fá það hlutverk að skoða greinar og vinnu Wards ofan í kjölinn. Nancy segir að rannsóknin muni taka tíma en þegar niðurstöður liggi fyrir verði þær birtar á síðum blaðsins.
