Á laugardaginn fannst lík 28 ára ljósmóður, Samantha Eastwood, í grunnri gröf nærri Caverswall í Staffordskíri á Englandi. Líkið var vafið inn í sæng og límt hafði verið yfir augu hennar og andlit. Þá hafði leit að henni staðið yfir í 8 daga.

Michael Stirling, 32 ára, hefur verið handtekinn grunaður um að hafa myrt Eastwood. Hann situr nú í gæsluvarðhaldi. Hann er mágur fyrrum unnusta Eastwood. Stirling er sakaður um að hafa myrt Eastwood einhvern tímann á tímabilinu 26. júlí til 5. ágúst í Baddeley Green í Stoke.

Þegar gæsluvarðhaldskrafan var tekin fyrir hjá dómi sagði saksóknari að rannsókn málsins væri flókin. Fram kom að bráðabirgðaniðurstaða krufningar sýndi að engir áverkar voru sjáanlegir á líkinu eftir skot, hnífsstungu eða önnur álíka vopn. Fram kom að frekari rannsóknir þurfi að gera á beinum í hálsi Eastwood.

Meðal þeirra gagna sem lögreglan hefur aflað eru upptökur úr eftirlitsmyndavélum, um símanotkun og um ferðir ökutækja.

Sky segir að verjandi Stirling hafi ekki farið fram á að hann yrði látinn laus gegn tryggingu.

Tveir menn til viðbótar, 28 og 60 ára, voru einnig handteknir vegna málsins en hafa verið látnir lausir gegn tryggingu.