Fjölmiðlakonan Guðrún Sóley hefur verið vegan undanfarin fjögur ár. Hún segir að lykillinn að góðri máltíð sé sósan og það skipti mestu máli að njóta þegar kemur að því að prófa sig áfram í veganisma. Hún deildi nýlega með okkur því sem hún borðar á venjulegum degi:

Sjá einnig: Þetta borðar Guðrún Sóley á venjulegum degi

Hér deilir hún uppskrift að „nicecream“ sem hún fær sér helst öll kvöld.

„Það er bananaís sem tekur 20 sekúndur að útbúa, stútfullur af dásamlegum vítamínum og magnesíumi, sem margir vilja meina að tryggi góðan nætursvefn. Svo þessi ís er nokkurn veginn læknisráð sem best er að fylgja daglega,“ segir Guðrún Sóley.

Innihald:

Frosnir bananar í bitum.

Gott að nýta banana á síðasta séns í þetta, í hvert sinn sem banani sýnir ellimerki er gott að afhýða hann, skera í bita og stinga í poka í frysti. Ég á alltaf risabirgðir af frosnum banana það er mikilvægt fæðuöryggisatriði.

Aðferð:

1. Takið banana úr frysti (fínt að miða við 1-2 banana á mann), leyfið að standa í stutta stund og setjið í matvinnsluvél eða blandara.
2. Eftir 20 sekúndna þeyting er kominn þéttur, rjómakenndur ís.
3. Á tyllidögum er hægt að bragðbæta t.d. með hnetueða möndlusmjöri, kaffidreitli, kakódufti, kanil eða þeim berjum sem ykkur finnast best. Klikkar ekki!