Bifreiðaverkstæðið Toppur hefur verið þjónustuverkstæði fyrir BL í háa herrans tíð en verkstæðið sjálft hefur verið starfandi frá árinu 1980. „Ég stofnaði fyrirtækið á sínum tíma og hef rekið það á sömu kennitölu alla tíð síðan. Toppur er sannkallað fjölskyldufyrirtæki enda rek ég þetta með strákunum mínum tveimur. Konan mín starfar hér líka ásamt þremur öðrum starfsmönnum. Allir mínir starfsmenn eru menntaðir bifvélavirkjar nema einn reynslubolti sem hefur verið hjá okkur mjög lengi og býr að mikilli þekkingu,“ segir Sigurjón Harðarson, eigandi bifreiðaverkstæðisins Topps. Fyrirtækið er mátulega stórt sem þýðir að þjónustan er á persónulegri nótum en gerist oft hjá stærri verkstæðum. „Við erum alltaf til taks þegar viðskiptavinir okkar þurfa að ná í okkur,“ bætir Sigurjón Harðarson við.
Allar almennar bílaviðgerðir
Starfsmenn Topps eru sex talsins og sinna öllum almennum bílaviðgerðum og viðhaldi svo sem bremsuklossaskiptum og bremsuviðgerðum, tímareimaskiptum, hjólastillingu og kúplingaskiptum. „Við erum þó ekki að sinna málningu og bílaréttingum þó svo við gerum næstum því allt annað.“ Í gegnum tíðina hefur bílaviðgerðarbransinn breyst töluvert með tilkomu aukinnar notkunar á tölvustýringu í nýrri bílum. „Tímarnir breytast og mennirnir með og því höfum við fylgt þróuninni eftir með námskeiðum, verkfærum og fleiru til þess að geta sinnt öllum bifreiðaviðgerðum. Þá búum við að fullkomnustu bilanagreiningartölvum sem völ er á sem geta lesið og bilanagreint allar helstu bifreiðar.“
Taka vel á móti öllum
Eins og áður sagði er Toppur meðal annars þjónustuverkstæði BL. „Við erum mikið til í þjónustueftirliti og ábyrgðarvinnu fyrir BL á Renault, Subaru og Nissan og uppfyllum allar þær kröfur sem þeir gera sem og alla staðla Bílgreinasambandsins. En að sjálfsögðu sjáum við um viðgerðir á öllum gerðum bíla og tökum vel á móti öllum viðskiptavinum.“
Nánari upplýsingar má nálgast á toppur.is
Skemmuvegur 34, Kópavogi
Sími: 557-9711