Meginhlutverk Miðstöðvar símenntunar á Suðurnesjum (MSS) er að efla sí- og endurmenntun Suðurnesjamanna, auka menntun og lífsgæði íbúa svæðisins og efla þannig einstaklinga og atvinnulíf. Miðstöðin hefur lengi lagt metnað í að koma til móts við þarfir Suðurnesjabúa til hvers konar endurmenntunar og sjálfseflingar. Á komandi hausti verða eru enn fleiri og spennandi leiðir færar til þess að efla sig og styrkja hjá MSS.
Mikil eftirspurn eftir jógakennaranámi!
Miðstöðin hefur sett á laggirnar nýtt jógakennaranám í samstarfi við Maríu Olsen, jógakennara. Námið er alls 200 klukkustundir og hefst 28. september næstkomandi. Námið er viðurkennt af jógakennarafélagi Íslands og Yoga Allience. „Það hefur verið töluverð eftirspurn eftir jógakennaranámi hér hjá MSS og þetta er í fyrsta skipti sem nám af þessu tagi er í boði á svæðinu. Hér er því um að ræða algjörlega nýtt tækifæri fyrir áhugasama að sækja sér jógamenntun í heimabyggð. Það var líka kjörið tækifæri að setja á fót samstarf af þessu tagi en námsframboð MSS er margvíslegt og miðar oftar en ekki út frá eftirspurn og þörfum í samfélaginu,“ segir Særún Rósa Ástþórsdóttir, verkefnastjóri Miðstöðvar símenntunar á Suðurnesjum.
„Það hefur verið draumur minn lengi að vera með kennaranám í Yoga. Að geta miðlað þekkingu minni og reynslu áfram til nemenda minna. Í fyrstu var driffjöðrin einnig að vera með þetta nám á Suðurnesjum og í samvinnu við MSS þá rættist sá draumur,“ segir María.
Góður undirbúningur undir starf jógakennarans
Í náminu er áhersla lögð á verklega kennslu og að þátttakendur fái góðan undirbúning til þess að takast sjálfir á við starf jógakennarans að loknu námi, þó svo margir sæki námið helst til þess að efla eigin færni og dýpka þekkingu sína í jógafræðunum. Námsþættir í náminu eru meðal annars lífstíll jógans, anatómía, kennslutækni, orkustöðvar, jóga Nidra og aðrar slökunaræfingar, siðareglur jógakennara, viðskipti, skattur og fleira, heimspeki og æfingakennsla.
Nánari upplýsingar um námsframboð MSS má nálgast á vef miðstöðvarinnar mss.is
Fylgstu með á Facebook: MSS (Miðstöð símenntunar á Suðurnesjum).
Krossmóar 4, 260 Reykjanesbæ.
Sími: 421-7500
Vefpóstur: mss@mss.is