Veitingastaðurinn Sumac, Laugavegi 28, dregur nafn sitt af djúprauðum villiberjum sem vaxa víða í Mið-Austurlöndum og við Miðjarðarhaf. Matseldin á Sumac sækir innblástur í stemningu frá Beirút í Líbanon og tælandi áhrif frá Marokkó. Á staðnum er ferskt hráefni úr íslenskri náttúru matreitt undir áhrifum Mið-Austurlanda og á matseðlinum eru eldgrillaðir réttir með framandi kryddi.
Bar með Miðjarðarhafsbrag
Matseðill staðarins er hannaður af þeim Þráni Frey Vigfússyni, Georg Halldórssyni og Hafsteini Ólafssyni, sem valinn var kokkur ársins árið 2017. Á barnum ríkir einnig andblær Miðjarðarhafsins og boðið er upp á ferska, fjölbreytta og freistandi kokteila. Á vínseðlinum blandast saman innblástur frá Evrópu, Marokkó og Líbanon.
Grillsumar á teini
Sumac kynnir um þessar mundir nýjan sumarmatseðil. „Aðaláherslan er á spjót, eða sem sagt mat grillaðan á teini,“ segir Þráinn Freyr Vigfússon, matreiðslumaður á staðnum. Umhverfið á Sumac er sérhannað af Hálfdáni Petersen, til að skila gestum einstakri upplifun. Opið rými er hannað kringum langan barinn, en heildarsvipurinn byggir á opnu eldhúsi, hráum steyptum veggjum en lýsingin er bæði hlýleg og stílhrein í senn.
Það er því sannkölluð matarupplifun að njóta nokkurra sumarspjóta á þessum nútímalega og stílhreina stað í hjarta miðbæjarins.
Hægt er að panta borð á heimasíðu Sumac eða í síma 537-9900.
www.sumac.is
Laugavegi 28
101 Reykjavík.