Metfjöldi viðburða er í Kópavogi á Vetrarhátíð sem fram fer um helgina. Safnanótt er á föstudeginum 8. febrúar og sundlauganótt laugardaginn 9. febrúar. Nálgastu dagskrána hér.
Þinn eigin ratleikur!
Ævar Þór Benediktsson verður sérstakur gestur á Bókasafni Kópavogs á Safnanótt en hann er höfundur bókaflokksins góðkunna. „Hátíðin dregur að þessu sinni nafn sitt af bókaflokki Ævars en hann leiðir áheyrendur á vit ævintýra með skemmtilegum viðburðum allt kvöldið,“ segir Soffía Karlsdóttir forstöðumaður menningarmála í Kópavogi.
Fyrir utan Bókasafn Kópavogs taka Náttúrufræðistofa Kópavogs, Salurinn, Héraðsskjalsafn Kópavogs, Gerðarsafn og Kópavogskirkja þátt í Safnanótt. „Dagskrá Vetrarhátíðar í Kópavogi hefur aldrei verið glæsilegri en núna. Viðburðir eru fjölmargir og ættu allir að finna eitthvað við sitt hæfi,“ bætir Soffía við.
Vídjóverk og raftónlistarupplifun
Af nógu eru að taka þegar fjallað er um Safnanótt í Kópavogi. Kópavogskirkja og Borgarholtið taka á sig óvenjulega mynd með vörpun á vídeóverki Hrundar Atladóttur Inni í kirkjunni verður raftónlistarupplifun undir stjórn Arnljóts Sigurðssonar og Sr. Sigurður Arnarson veitir leiðsögn um nýuppgerða glugga Gerðar Helgadóttur.
Vatnalífverur
Í Náttúrufræðistofu verða lífverur í vötnum, sýnatökur og rannsóknir til umfjöllunar, sérfræðingar sýna aðferðir og svara spurningum forvitinna gesta.
Dansleiðsögn og gestir taka þátt í list
Í Gerðarsafni verður boðið upp á hefðbundna og dansleiðsögn um sýninguna Ó, hve hljótt. Þá leiðir Curver Thoroddsen viðburð þar sem gestir varpa eigin vídeóverki á veggi. Midpunkt gallerí tekur þátt og sýnir einnig brot af verkum frá síðustu sýningum.
Uppistand og tónleikar
Í Salnum verða tvennir tónleikar með Gissuri Páli Gissurarsyni, Andri Ívars uppistandari kitlar hláturtaugarnar í Bókasafninu og þar geta gestir líka sveiflað sér í arabískum dansi svo fátt eitt sé nefnt.
Hamingjustund
Þess má að lokum geta að Safnanótt stendur frá 18.00 til 23.00 en Pure Deli, veitingastaðurinn í Gerðarsafni verður opinn til miðnættis. Þar verður hamingjustund (happy hour) allt kvöldið.
Frítt í sund
Sundlauganótt fer fram 9. febrúar í Salalaug í Kópavogi. Frítt verður í laugina frá klukkan 18.00 og opið til 22.00. Boðið verður upp á skemmtilega dagskrá, aqua zumba, jóga, samflot og þá verður Bjarni töframaður á svæðinu. Rómantísk stemning og tónlist verður við útilaugina, og lýst upp með kyndlum. Ókeypis ís verður á boðstólum fyrir börnin.
Það er greinilega af nógu að taka á Vetrarhátíð Kópavogs!