Leifur Geir Hafsteinsson, mannauðsstjóri Völku, var tekinn tali hjá DV og spurður um þátttöku fyrirtækisins í Reykjavíkurmaraþoni Íslandsbanka, en nokkuð hefur borið á því að fyrirtæki hafi verið að senda starfsmenn sína í hlaupið. „Fyrirtækjaþátttöku fer fjölgandi með hverju árinu, enda fær vinnustaðurinn ýmislegt út úr því að hvetja starfsfólk sitt til þátttöku í hlaupinu, hvort sem fólk hleypur 3, 10, 21 eða 42 km,“ segir Leifur.
Af hverju heldurðu að fyrirtæki hvetji starfsmenn sína til þátttöku?
„Það eru margar góðar ástæður fyrir því. Fyrst má nefna að heilbrigt og kröftugt starfsfólk er líklegra til að vera minna veikt og almennt jákvæðara og sprækara á vinnustaðnum. Þátttaka í svona viðburði er einnig mikilvægt hópefli. Þarna kynnast vinnufélagar úr mismunandi deildum, æfa saman að settu marki og upplifa sameiginlega sigurtilfinningu að hlaupinu loknu. Allt skilar þetta sér í eftirsóknarverðri fyrirtækismenningu þar sem heilbrigði, vinnusemi og jafnvægi er sett í öndvegi.“
Hvernig styðja fyrirtæki við bakið á sínu starfsfólki?
„Með ýmsum hætti. Á mínum vinnustað t.d. borgar Valka þátttökugjöld starfsmanna og við stöndum fyrir útileikfimi þrisvar í viku til að búa starfsmenn sem best undir hlaupið. Við tökum þátt í að kaupa og merkja keppnisboli í litum fyrirtækisins þannig að hlauparar og stuðningsfólk skeri sig úr. Svo munum við skipuleggja fögnuð nálægt markinu til að taka á móti hlaupurunum okkar, sem hlaupa að sjálfsögðu til styrktar góðu málefni.“
Er eitthvað um það að hópar séu að mæta í búningum?
„Margir eru auðvitað í eins bolum merktum sínu fyrirtæki, en einnig fer sífellt fjölgandi þeim skemmtilegu þátttakendum sem mæta í alls konar grímubúningum. Við hjá Völku erum þó ekki komin alveg svo langt!“