Samkvæmt dagatalinu eru bara nokkrar vikur eftir af vetrinum, sem betur fer. Þótt það sé kaldur, dimmur vetur með tilheyrandi bílrúðuskafi, morgunþreytu, forstofubleytu og kvefi þá eru nokkrar leiðir til að halda sér frískum og ferskum á meðan beðið er eftir sumrinu.
Við hér nyrst á norðurhveli jarðar fáum ekki nógu mikla sól á veturna, það veldur þreytu og jafnvel skapvonsku. Þess vegna er mikilvægt að reyna að láta sólina skína eins mikið á mann og hægt er. Gott er að fara í göngutúr í hvert skipti sem færi gefst eða verða sér úti um dagsbirtulampa.
Þú átt vissulega skilið að fá ís og nammi eftir að hafa klöngrast í gegnum snjó og gert þitt besta til að fótbrotna ekki. Það er hins vegar ekki hollt, það er miklu betra fyrir heilsuna og líðanina til lengri tíma að skipta namminu, snakkinu og ísnum út fyrir ber, mandarínur og epli.
Það er gott að vera með sterkt ónæmiskerfi þegar kveftímabilið gengur yfir. Mjólk inniheldur mikið af próteinum, A og B12-vítamínum og kalk. Ef þér hugnast ekki að drekka mjólk þá er hægt að búa til heitt kakó.
Nýttu hvert tækifæri sem gefst til að fara út úr húsi, gaman er að prófa eitthvað nýtt eins og að fara út að renna sér í svörtum ruslapoka eða jafnvel á skauta. Hreyfing er ekki bara holl og útiveran góð leið til að nálgast smá sólskin heldur getur útivera með fjölskyldunni minnkað spennuna á heimilinu sem fylgir því að hanga inni vikum saman.
Morgunverður er mikilvægasta máltíð dagsins og enn mikilvægari á veturna. Góður og næringarríkur morgunverður gefur þér meiri orku yfir daginn og styrkir ónæmiskerfið.
