Veitinga- og skemmtistaðurinn Húsið er til húsa að Hrannargötu 2 á Ísafirði og blasir við um leið og ekið er inn í bæinn. Halldór ræður ríkjum í Húsinu og er oftast kenndur við staðinn. Mikið er um að vera á staðnum hans sem og alls staðar í bænum um verslunarmannahelgina en það er Mýrarboltinn sem knýr fjörið áfram þessa helgi. Halldór sjálfur er vel kunnugur Mýrarboltanum og er nú að taka þátt í tíunda – og að hans sögn síðasta skipti.

„Maður er kominn á aldur og ég ætla að hafa þetta síðasta skipti. Ég keppi með liðinu FC Kareaoki sem verður brátt sögufrægt enda er verið að gera heimildamynd um það,“ segir Halldór, en Mýrarboltinn er nú haldinn í 12. skipti.

Halldór segir að keppnin hafi stækkað gífurlega í gegnum árin:

„Í upphafi voru þetta bara fimm til sex lið en núna eru um 80 lið búin að skrá sig til leiks,“ segir Halldór. Það má því eiga von á mörg hundruð keppendum um verslunarmannahelgina en auk keppendanna koma fjölmargir áhorfendur. Segir Halldór að ekki megi í milli sjá hvort sé meiri skemmtun, að taka þátt í keppninni eða að horfa á hana. Hvort tveggja sé ógleymanlega upplifun: „Fólk ætti endilega að skreppa vestur og upplifa þetta, það verður ekki svikið af því,“ segir Halldór.

Geysilega margt verður í boði á Ísafirði um verslunarmannahelgina. Er þar jafnt um að ræða fjölskylduskemmtanir sem næturdansleiki. Á stað Halldórs, Húsinu, verður mikið um að vera og má þar meðal annars nefna dansleik með hljómsveitinni Boogie Trouble, aðfaranótt mánudags, en hún spilar þá frá miðnætti til klukkan 4 um nóttina. Fyrr um kvöldið verður lítil brenna þar sem fólk safnast saman og Páll Óskar og fleiri tónlistarmenn koma fram. Það verður líka stórt ball í Edinborgarhúsinu um helgina þar sem Páll Óskar stígur líka á svið.

Það er alltaf mikið að gera í veitingasalnum hjá Halldóri um verslunarmannahelgina og raunar er mikið að gera hjá honum allt sumarið. Má búast við því að hvert borð verið setið alla helgina. Matseðillinn er fjölbreyttur, frá réttum á borð við grænmetisbökur og hamborgara upp í fínustu nautasteikur. Einnig er fiskur dagsins og súpa dagsins mjög vinsæl á staðnum.