Ófeigur, Skólavörðustíg 5
Hjá Ófeigi, Skólavörðustíg 5, eru nú í boði trúlofunar- og giftingarhringar úr títaníum, í miklu úrvali, alls um 130 gerðir. Títaníum er góðmálmur, dýrari en silfur og ódýrari en gull. Að sögn Bolla Ófeigssonar gullsmiðs hefur títaníum mikla kosti sem efni í skartgripi, meðal annars þann að efnið er ofnæmisfrítt og það fellur ekki á það.
„Þetta er málmurinn sem notaður er í gerviliði enda er hann ofnæmisfrír. Þessir hringar eru úr 100% títaníum og eru léttir. Málmurinn er mjög harður þannig að hann rispast síður en gull og silfur. Hringarnir halda sér því mjög vel,“ segir Bolli. Hann útskýrir jafnframt hvernig títaníum er góður kostur fyrir þá mörgu sem kjósa silfurlitaða skartgripi:
„Það eru margir sem vilja silfurlitaða hringa og þeir eru miklu vinsælli en gulllitaðir hringar. Margir fara þá leið að fá sér járn- og stálhringa en slíkir hringar eru á svipuðu verði og títaníumhringarnir hjá okkur. Oft er verið að reyna að ná silfurlitnum með hvítagulli, sem er svo karakterlaust að í flestum tilvikum er það rhodium-húðað.“
Þó að títaníum sé dýr málmur hefur Bolli náð hagstæðum samningum við virtan danskan hönnuð og býður þessa vönduðu títaníum-hringa á mjög hagstæðu verði. Ódýrasta hringaparið kostar aðeins 18.000 krónur. Einnig er hægt að fá hringapar þar sem dömuhringurinn er með demanti á aðeins 26.000 krónur. Verðbilið nær upp í 170.000 krónur en verðið fer eftir því hve marga og hve stóra demanta fólk kýs að hafa í sínum hringum.
Hægt er að láta grafa bæði innan í og utan á hringana. Að sögn Bolla er það aðeins hugmyndaflugið sem takmarkar þá skreytingu því hægt er að skanna myndir fyrir inngröft. Þannig er til dæmis hægt að grafa í fingrafar, handskreytingu, teikningu og hvað eina.
Bolli Ófeigsson gullsmiður er sonur Ófeigs Björnssonar, stofnanda Gullsmiðju og Listmunahúss Ófeigs, en feðgarnir eru báðir gullsmíðameistarar. Einnig eru þar skartgripir eftir Dýrfinnu Torfadóttur og Karl Gústaf Davíðsson gullsmiði. Fyrir utan títaníum-hringana sem hér er fjallað um eru allir aðrir skartgripir í versluninni hannaðir á staðnum.
Móðir Bolla, Hildur Bolladóttir, er kjólameistari og kjólarnir sem hún hannar og saumar eru til sýnis og sölu í versluninni. Það er því sannarlega skemmtileg upplifun að skoða sig um hjá Ófeigi en staðurinn tengist líka þekktum uppákomum á borð við Reykjavík Bacon Festival, Kjötsúpudeginum, Blúshátíð í Reykjavík og Blómadeginum.
Ný heimasíða, ofeigur.is fór í loftið í mars og þar er hægt að skoða alla trúlofunarhringana og annað sem Ófeigur hefur upp á að bjóða.
