25% afsláttur af granítlegsteinum út maí

Allt frá árinu 1953 hefur S. Helgason framleitt legsteina. Við þá framleiðslu hafa fjölmargir þættir bæst, t.d. borðplötur, sólbekkir og grásteinsplötur í arna, svo fátt eitt sé nefnt. Árið 2011 bættist steinsmiðjan Sólsteinar við starfsemi S.Helgasonar og á síðasta ári keypti S.Helgason steinsmiðjuna Mósaík, sem var önnur elsta steinsmiðja landsins. Starfsemi sameinaðra smiðja er nú rekin á Skemmuvegi 48 í Kópavogi undir nafninu S.Helgason.

Ásgeir Nikulás Ásgeirsson sölustjóri segir mikinn ávinning hafa orðið af sameiningu þessara þriggja steinsmiðja:

„Fyrir utan augljósan rekstrarlegan ávinning, þ.e. að reka eina einingu í stað þriggja, var það ekki síður sú mikla verkþekking sem þarna sameinast á einn stað sem og aukin framleiðslugeta til að takast á við stór og fjölbreytt verkefni. Hryggjarstykkið hefur frá öndverðu verið framleiðsla legsteina og leggur fyrirtækið mikinn metnað í að skila frá sér fallegum minningarmerkjum til viðskiptavina sinna.“

Granít, marmari og íslenskar bergtegundir

S.Helgason býður uppá legsteina úr graníti og marmara en sérstaðan liggur þó í smíði á legsteinum úr íslensku hráefni. Stuðlaberg hefur lengi verið vinsælt í legsteina enda fer þar saman mikið veðrunarþol og fjölmargir möguleikar í útfærslum. Sumir kjósa að fá óunna stuðlabergsdranga á meðan aðrir velja meira unna steina en þá koma fram fallegar æðar sem myndast hafa við storknun og gefa legsteininum mikinn svip og engir tveir steinar eru eins. Legsteinar úr gabbró og líparít eru einnig vinsælir og þykja mikil prýði.

Meðfram legsteinasmíðinni sinnir smiðjan hinni ýmsu þjónustu er tengist viðhaldi steinanna. Málað er í letur sem farið er að dofna og steinar sem farnir eru að skekkjast réttir af. Ásgeir segir einnig mikið um að áletrunum sé bætt við eldri steina.