Jaishankar hefur mörg líf á samviskunni – Beitti sveðju á fórnarlömb sín
Eitthvað gekk indversku lögreglunni erfiðlega að koma lögum yfir M Jaishankar, siðblindan nauðgara og raðmorðingja sem hafði ýmislegt miður hugnanlegt á samviskunni.
Á árunum 2006–2009 hafði Jaishankar, sem er frá þorpinu Kanyapattanam Konasamudra í Salem, verið stórtækur hvað varðaði nauðganir, pyntingar og morð. Hann hafði ávallt sveðju í fórum sínum og ef fórnarlömb hans voru með eitthvert múður þá beitti hann henni hiklaust. Eftir að hafa látið til sín taka, meðal annars í Chennai, Hosur, Salem, Tirupattur og Bangalore, var Jaishankar loks handtekinn, í fyrsta skipti, í október árið 2009.
Í mars árið 2011, þann 18. nánar tiltekið, átti að flytja Jaishankar frá Coimbatore til Darmapuri. Á strætisvagnastoppistöð tókst honum að snúa á lögregluna og komst undan á flótta. Einn lögreglumannanna sem sáu um flutninginn fylltist svo mikilli skömm að hann svipti sig síðar lífi, en það er önnur saga.
Í einn og hálfan mánuð reyndi lögreglan að hafa hendur í hári kónans. Sjálfur beið Jaishankar ekki boðanna og fyrr en varði hrönnuðust líkin upp; sex konur, einn karlmaður og eitt barn.
Í apríl fékk lögreglan veður af Jaishankar í Bangalore, en greip í tómt þegar upp var staðið.
Næst spurðist til Jaishankars í Nýju-Delí en enn tókst honum að forðast laganna verði, en þegar þar var komið sögu, í maíbyrjun, 2011, virtist aðeins tímaspursmál hvenær lögreglan hefði erindi sem erfiði.
Lögreglunni barst til eyrna að Jaishankar hefði holað sér niður einhvers staðar í Mumbai og ljóst þótti að leitinni lyki innan tíðar. Sú varð enda raunin 5. maí þegar Jaishankar var loks handtekinn, öðru sinni, í Karnataka-héraði.
En Adam var ekki lengi í Paradís og nú víkur sögunni til Parappana Agrahara-fangelsisins í Bangalore árið 2013.
Á nánast ævintýralegan hátt tókst Jaishankar að flýja úr fangelsinu í september 2013. Hann hafði undirbúið flóttann í tvo mánuði og lagt á minnið venjur varðanna og þá tímatöflu sem þeir fóru eftir.
Að lokinni eftirlitsferð varðanna 2. september opnaði hann klefa sinn með lykli sem hann hafði útbúið og komst niður á jarðhæð fangelsisins. Vegna handvammar varðanna hafði ekki verið læst tveimur hliðum sem lágu út í fangelsisgarðinn.
Jaishankar ku hafa notað bambusstöng til að komast upp á rúmlega sex metra háan fangelsisvegg, síðan þurfti hann að ganga eftir öðrum vegg, eilítið lægri, og þaðan klifra upp á níu metra háan vegg. Með belti og laki sem hann hafði komið höndum yfir tókst Jaishankar síðan að slaka sér niður og út í frelsið.
Í þetta sinn gat Jaishankar þó ekki lengi um frjálst höfuð strokið. Hann var handtekinn, í þriðja skipti, þann 6. september. En flóttinn hafði örlagaríkar afleiðingar fyrir ellefu fangaverði sem fengu reisupokann vegna vanrækslu í starfi.
Jaishankar fékk, í apríl 2014, 10 ára dóm fyrir nauðgun og morð, en hans bíða að auki réttarhöld vegna 20 svipaðra mála.