John og Kevin töldu mann í lífshættu – Kostaði annan þeirra lífið
Síðastliðinn föstudag gerðu tveir slökkviliðsmenn í bænum Morningside í Maryland-fylki í Bandaríkjunum heiðarlega tilraun til að koma bæjarbúa til hjálpar. Þannig var mál með vexti að tilkynning hafði borist frá manni nokkrum sem ekki hafði náð sambandi við bróður sinn. Hafði maðurinn miklar áhyggjur því bróðir hans, sem þjáist af sykursýki, hafði nokkrum dögum fyrr hnigið í yfirlið vegna sjúkdómsins.
Slökkviliðsmennirnir, John Ulmschneider, 37 ára, og Kevin Swain, 19 ára, bönkuðu upp á hjá þeim sykursjúka og gerðu grein fyrir sér. Þegar enginn kom til dyra tóku þeir þá ákvörðun að þvinga upp hurðina enda mögulega mannslíf í húfi.
Vissu þeir John og Kevin ekki fyrr en skotum rigndi yfir þá og fengu þeir báðir í sig skot. John Ulmschneider lést seinna af sárum sínum en Kevin slapp með skrekkinn.
Þeim sykursjúka tókst einnig að skjóta áhyggjufullan bróður sinn í öxlina, en hann var viðstaddur þegar John og Kevin freistuðu þess að komast inn í húsið. Bróðirinn er þó ekki lífshættulega særður.
Lögreglan hefur komist að þeirri niðurstöðu að um mikinn harmleik hafi verið að ræða fyrir alla sem málið snertir.
Að sögn yfirvalda hélt sá sykursjúki að um innbrotsþjóf væri að ræða og greip því til byssunnar. Hann var handtekinn í kjölfarið en sleppt úr haldi um sólarhring síðar, að lokinni yfirheyrslu. Þar sem um sjálfsvörn var að ræða verður hann ekki ákærður.