Minnst sextán börn smituðust af e.coli eftir heimsókn á bæinn Efstadal II í Bláskógabyggð. Á bænum geta gestir keypt sér mjólkurís og gætt sér á honum fyrir framan kýrnar sem mjólkin í ísnum kom úr. Þar hefur einnig verið hægt að klappa kálfum. Af þessum 16 börnum hafa þrjú veikst alvarlega. Tvö eru á batavegi en eitt þeirra, fimm mánaða drengur, er þungt haldið. Eigendur Efstadal II segjast miður sín yfir málinu og að gripið hafi verið til heilmikilla aðgerða á bænum. Lokað var á aðgang að dýrum og framleiðsla stöðvuð. Veitingastaðnum var þó ekki lokað, og áfram er tekið á móti gestum og sögðu eigendur að ekki væri hættulegt að sækja bæinn heim. Þetta reddast hefur lengi verið vinsælt stef meðal Íslendinga. Sóttvarna- og landlæknir hafa gefið út að grunur leiki á að smitið hafi borist með ís, en gæti líka hafa borist með snertingu við kálfana. Af hverju ekki að loka staðnum, rétt á meðan rannsóknir fara fram? Til hvers að taka sénsinn, jafnvel þótt hann sé minniháttar, á að fleiri börn leggist alvarlega veik inn á sjúkrahús. Hagnaðartap af því að loka í vikur eða tvær getur ekki mögulega vegið þyngra en líf og heilsa þeirra barna sem sækja bæinn heim. Tökum ekki sénsa með börnin okkar, hlutirnir reddast nefnilega ekki alltaf.
