„Við erum til í þetta“ sagði Sanna Magdalena Mörtudóttir, nýr borgarfulltrúi Sósíalistaflokksins í samtali við DV í nótt. En hún sló met Davíðs Oddssonar, frá árinu 1984, og er yngsti borgarfulltrúi sögunnar í Reykjavík, aðeins 26 ára gömul.

„Ég er enn þá að fatta að þetta sé að gerast en það er mjög jákvætt. Ég hef alltaf stokkið ofan í djúpu laugina og læt ekkert hræða mig.“

Þegar kom að næstu skrefum og mögulegu meirihlutasamstarfi við aðra flokka sagði Sanna að Sósíalistaflokkurinn væri grasrótarflokkur og þetta samtal yrði að vera unnið á því stigi áður en næstu skref yrðu ákveðin.

Þið eruð nú ekkert langt frá til dæmis Vinstri Grænum og Pírötum varðandi stór málefni?

„En við erum mjög róttæk og viljum breytingar strax. Fólkið getur ekki beðið lengur eftir bættum kjörum.“

Eins og flestir vita unnu Sósíalistar góðan sigur í Reykjavík með 6,37 prósentum og einum fulltrúa. Fékk flokkurinn því meira fylgi en til dæmis Miðflokkurinn, Framsóknarflokkurinn, Flokkur fólksins og Vinstri Grænir. Allt flokkar sem eiga fulltrúa á Alþingi.