Gullúr sem John Jacob Astor IV átti seldist á dögunum á uppboði á tæplega 1,5 milljónir dollara eða rúmar 200 milljónir íslenskra króna. Astor þessi var einn ríkasti maður heims þegar hann steig um borð í hina örlagaríku ferð farþegaskipsins Titanic ásamt eiginkonu sinni, Madeleine Talmage Force. Það fórst þann 15. apríl árið 1912 og var Astor  meðal þeirra 1500 farþega sem áætlað er að hafi látist í slysinu. Eiginkona hans, Madeleine, lifði hins vegar af en hún var ólétt þegar slysið átti sér stað.

Segir sagan að Astor hafi komið henni um borð í einn af björgunarbát skipsins en hann hafi sjálfur ekki fengið að stíga um borð því konur og börn voru í forgangi. Á hann að hafa kveikt sér í sígarettu á þilfarinu og haldið fast um úrið sitt síðustu andartökin en lengi vel taldi hann, eins og aðrir farþegar, að útilokað væri að skipið myndi sökkva þessa skelfilegu nótt.

Á líki Astor, sem fannst á reki tæpri viku eftir slysið, fundust nokkrir rándýrir munir auk úrsins, meðal annars demantshringur og demantsermahnappar. Áðurnefnt gullúr var hins vegar  dýrmætasti munurinn.

Uppboðshúsið Henry Aldridge & Sons sá um söluna en þar á bæ var áætlað að söluverðmætið væri ríflega 20 milljónir króna. Áhuginn á úrinu kom því uppboðshöldurum í opna skjöldu en úrið seldist, eins og áður segir, á um tíföldu áætluðu verði. Það þýðir að úrið er orðið dýrasti hlutur sem hefur selst úr Titanic-slysinu.

Þegar úrið fannst var því og öðrum munum skilað til fjölskyldu Astor og hefur það verið í eigu fjölskyldunnar síðan eða allt þar til að nýr eigandi keypti hinn glæsilega safngrip.