Þar var hann spurður út í hvað væri að gerast á Reykjanesi en eins og komið hefur fram í fréttum heldur landris og kvikusöfnun áfram undir Svartsengi.
Veðurstofan greindi frá því í gær að kvikuhlaup og eldgos á Sundhnúksgígaröðinni sé áfram líklegasta sviðsmyndin, en nú þegar hafa 23 milljónir rúmmetra safnast frá síðasta eldgosi. Þetta er mesta kvikusöfnun á milli eldgosa frá upphafi eldgosahrinunnar og varaði Veðurstofan við því að langt goshlé þýði ekki að eldgosahrinunni sé lokið.
Þorvaldur er þeirrar skoðunar að þetta mikla kvikumagn þýði ekki endilega að það verði eldgos. Hann bendir á að hægt hafi á landrisinu og það hafi raunar ekki verið mikið það sem af er marsmánuði.
„Þetta er ekki bara háð magninu á kvikunni heldur líka hvernig spennuuppbyggingin er,” sagði Þorvaldur og hvatti fólk til að sjá fyrir sér blöðru sem blásið er í.
„Ef það er meira í henni en áður þá er þenslan meiri. En ef þú hefur gert það hægar þá hefur gúmmíið meiri tíma til að taka á móti álaginu og jafna sig aðeins,” sagði hann og bætti við að þessi langa uppbygging á svæðinu gæti þýtt að skorpan geti betur aðlagað sig þessum nýju aðstæðum og þar af leiðandi muni hún hugsanlega ekki bresta.
Hvað finnst þér líklegast?
„Núna finnst mér líklegast að það verði ekki gos þrátt fyrir þetta magn kviku. Móðir náttúra getur alveg strítt mér með það. En bara þessi hæga uppbygging á spennunni getur alveg leitt til þess að það verði bara ekkert gos, þetta endi með því að við fáum nýja hleðslu á kviku í inn í þessa kvikugeymslu og þá erum við komin með orku til framtíðar. Hún situr þá bara þarna og kólnar niður hægt og rólega og heldur áfram að hita upp jarðhitakerfið næstu nokkur hundruð árin.”
En fari svo að það gjósi hefur Þorvaldur ekki ýkja miklar áhyggjur af því að gosið yrði kröftugt.
„Það gæti orðið það stærsta en það yrði sennilega ekki það aflmesta, það myndi verða tiltölulega rólegt myndi ég halda, eða rólegri en hin gosin í byrjun en það gæti varað lengur. Það gæti þá myndast stærra hraun.”
Þorvaldur var svo að lokum spurður hvort einhver hamagangur væri undir okkur annars staðar á landinu. Hann benti á Snæfellsnes og sagði nokkuð ljóst að það sé einhver kvikusöfnun í gangi undir Ljósufjallakerfinu.
„Jú, jú, það eru önnur svæði sem eru í gangi eins og Katla og Öskjusvæðið og það er alltaf einhver virkni undir Vatnajökli. Við getum alveg búist við því að einhver af þessum eldstöðvum sýni sig með eldgosi núna á næstu mánuðum eða árum.”
Aðspurður hvort Hekla væri að gera sig líklega sagði hann að lítil merki væru um það.
„Það hefur þó verið landris þar en ég hef verið að horfa á þetta undanfarna mánuði og mér sýnist eins og Hekla sé búin með sína hringrás sem byrjaði árið 1104 með sprengigosi sem eyddi Þjórsárdal. Núna þurfi hún eina, tvær, þrjár aldir til að hlaða aftur í byssuna. Við getum alveg eins búist við því að Hekla verði bara sallaróleg á næstunni.”
