Andrés Jónsson almannatengill segist vona að ummæli sem Sigmundur Davíð Gunnlaugsson, formaður Miðflokksins, lét falla í kvöldfréttum Sýnar í gærkvöldi hafi verið sögð í hugsunarleysi.

„Ef ekki þá er þetta það ljótasta sem ég heyrt nokkurn íslenskan stjórnmálamann segja,“ sagði Andrés.

Í umræddri frétt Sýnar var sagt frá þeirri ákvörðun íslenskra stjórnvalda að taka þátt í málsókn Suður-Afríku gegn Ísrael fyrir Alþjóðadómstólnum. Í málinu fer Suður-Afríka fram á að Ísrael verði dæmt brotlegt við skyldur sínar samkvæmt hópmorðssáttmála Sameinuðu þjóðanna fyrir framgöngu sína í stríðinu á Gaza.

Í viðtalinu sagði Sigmundur Davíð meðal annars að hann hefði ekkert á móti því að Íslendingar legðu sitt af mörkum til að rannsaka hugsanlega stríðsglæpi og refsa fyrir þá. Málið snúist um fullyrðingar um að Ísrael hafi ætlað sér að fremja þjóðarmorð.

„Hafi sú verið raunin, þá hefur þeim gengið afskaplega illa með það og maður veit ekki alveg af hverju þeir eru að senda út viðvaranir og reyna að hlífa almennum borgurum ef að það var markmiðið.“

Vona að þetta hafi verið hugsunarlaus ummæli. Ef ekki þá er þetta það ljótasta sem ég hef heyrt nokkurn íslenskan stjórnmálamann segja. pic.twitter.com/vHkdHbCuj3

— Andrés Jónsson (@andresjons) March 12, 2026

Sigmundur hefur brugðist við ummælum Andrésar, en það gerði hann á Facebook-síðu sinni nú í hádeginu.

„Það hvarflar ekki að mér að halda því fram að Andrés Jónsson sé heimskur maður. Fyrir vikið verð ég að álykta að hann geri sér það upp í pólitískum tilgangi. Ég vona að hann ráðleggi ekki skjólstæðingum sínum og pólitískum samherjum að gera slíkt hið sama. Það myndi þó skýra ýmislegt ef sú er raunin.”