Kjartan Már Kjartansson bæjarstjóri í Reykjanesbæ, Orri Björnsson oddviti Sjálfstæðisflokksins í bæjarstjórn Hafnarfjarðar og Runólfur Ágústsson stjórnarmaður í Fluglestinni þróunarfélagi ehf. leggja til að Borgarlína verði slegin út af borðinu. Þeir eru langt í frá þeir fyrstu til þess enda um dýra, umfangsmikla og umdeilda framkvæmd að ræða. Þremenningarnir leggja þó ekki til eins og sumir gagnrýnendur að gera ekkert í staðinn fyrir Borgarlínu heldur telja þeir mun heppilegri lausn að koma upp lestakerfi bæði innan höfuðborgarsvæðisins og frá því til Suðurnesja. Fyrrverandi bæjarfulltrúi í Hafnarfirði vill hins vegar meina að meirihluti bæjarstjórnar hafi komið í veg fyrir að þessari hugmynd yrði hrint í framkvæmd fyrir um áratug síðan.
Þetta kemur fram í sameiginlegri grein þeirra á Vísi.
Þremenningarnir segja mjög skiljanlegt að mikið hafi verið rætt um Borgarlínu og þörfina á samgöngubótum á höfuðborgarsvæðinu. Þörfin fyrir betri samgöngur, styttri ferðatíma og aukna burðargetu í samgöngukerfinu sé augljós, og álag á helstu stofnæðum hafi lengi verið vaxandi áskorun þannig að daglegur veruleiki of margra sé að sitja föst í umferðinni.
Þess vegna sé mikilvægt að skoða fleiri leiðir en Borgarlínu. Sérstaklega á leggnum milli Reykjavíkur og Hafnarfjarðar en þessi tenging sé ein sú mikilvægasta á höfuðborgarsvæðinu — fyrir íbúa, þjónustu, atvinnulíf. Spyrja þurfi hvað skili mestum ávinningi í samgönguframkvæmdum. Ljóst sé að framkvæmdir við Borgarlínu muni hafa of mikið rask í för með sér:
„Hætt er við því að lagning Borgarlínu, ofanjarðar á annarri stofnbrautinni milli Reykjavíkur og Hafnafjarðar, loki eða takmarki umferð um þær árum saman á meðan á framkvæmdum stendur og hneppi íbúa þar nánast í stofufangelsi á meðan.“
Lausnin sé að nýta gömul áform um lest á milli Reykjavíkur og Keflavíkurflugvallar og skoða hvort þau gagnist ekki við að sameina við áform um Borgarlínulegg til Hafnarfjarðar, auk þess að tengja Reykjanes og höfuðborgarsvæðið saman í eitt atvinnu- og þjónustusvæði. Lestarlína undir borginni sé lausn sem geti boðið upp á meiri burðargetu, meiri hraða, meiri fyrirsjáanleika og stöðugri ferðatíma, óháð umferð og veðri. Slík geti tengt saman kjarna svæðisins með skýrum hætti og skapað innviði sem standi í áratugi.
Hægt sé með þessu að sameina borgarlest sem þjóni daglegum ferðum innan höfuðborgarsvæðisins og lest sem tengi borgina við Reykjanesbæ og Keflavíkurflugvöll. Með því að byggja lestarlínu í göngum undir borginni með tvöföldum teinum verði línan ekki aðeins tenging fyrir ferðamenn til og frá flugvellinum, heldur hluti af daglegu samgöngukerfi borgarbúa og íbúa á Reykjanesi. Tíðni ferða skipti þar sköpum: þegar kerfi sé nógu þétt og áreiðanlegt verði það raunhæfur valkostur sem fólk geti treyst á í vinnu, skóla og daglegum erindum. Hér sé ótalið að lest í göngum létti á bílaumferð um stofnbrautir á yfirborði, en þrengi ekki að þeim eins og Borgarlína.
Telja þeir heppilegast að endastöðvar fyrir borgarhluta þessa lestakerfis verði í Hafnarfirði og á BSÍ en að síðan verði stöðvar í Vogum og Reykjanesbæ með endastöð undir komu- og brottfararsölum flugstöðvar Leifs Eiríkssonar. Einnig sé hægt að hafa sérstaka hraðlest fyrir flugfarþega.
Kostnaðartölur eru ekki nefndar í greininni en í staðinn minnt á að um sé að ræða samgöngubætur fyrir fjölmennasta svæði landins:
„Áformuð Fjarðaheiðagöng áttu að kosta 50 milljarða króna og átti að þjóna tiltölulega fáum. Hér er um að ræða framkvæmd sem þjónar hundruðum þúsunda og yrði mikilvægasta samgöngubót í sögu þjóðarinnar.“
Segja þremenningarnir að meta þurfi hvort lest í göngum geti skilað meiri burðargetu, styttri ferðatíma, meiri fyrirsjáanleika og sterkari langtímaávinningi en fyrirhuguð Borgarlína. Kominn sé tími til að hugsa upp á nýtt heildstætt um samgöngur milli Reykjavíkur, Hafnafjarðar, Reykjanesbæjar og Keflavíkurflugvallar.
Grein Runólfs, Orra og Kjartans er hægt að kynna sér nánar hér.
Gunnar Axel Axelsson fyrrverandi bæjarfulltrúi Samfylkingarinnar í Hafnarfirði og fyrrum bæjarstjóri í Vogum fagnar grein þremenninganna í pistli á Facebook. Hann segir um löngu tímabært verkefni að ræða sem hefði getað orðið að veruleika þegar árið 2018 ef þáverandi meirihluti bæjarstjórnar Hafnarfjarðar hefði ekki komið í veg fyrir það.
Fram að kosningum það ár mynduðu Sjálfstæðisflokkurinn og Björt Framtíð meirihluta en Framsóknarflokkurinn tók sæti Bjartrar Framtíðar eftir kosningarnar. Væntanlega á Gunnar Axel við fyrrnefnda meirihlutann en hann sat sjálfur í bæjarstjórn frá 2010-2018. Fyrra kjörtímabilið í meirihluta en það seinna í minnihluta.
Gunnar Axel segir að öll sveitarfélög á Höfuðborgarsvæðinu og Suðurnesjum hafi samþykkt að taka þátt í undirbúningi þessa verkefnis en þáverandi meirihluti í bæjarstjórn Hafnarfjarðar hafi stöðvað það með því að nýta neitunarvald sitt. Þetta hafi þó á þeim tíma verið hugsað sem viðbót við almenningssamgöngur en ekki stillt upp á móti Borgarlínu. Segja megi að Hafnarfjarðabær hafi stöðvað mikilvægasta samgöngumál í sögu þjóðarinnar. Það sé fagnaðarefni að þeir sem hafi verið á móti þessu á sínum tíma hafi nú skipt um skoðun. Er þá Gunnar Axel væntanlega að vísa til að oddviti Sjálfstæðismanna í Hafnarfirði lýsi yfir stuðningi sínum en Orri var þó ekki í bæjarstjórn 2018.
