DV skýrði nýlega frá þessu nýja flugskeyti en fyrir helgi komu enn frekari upplýsingar fram um það þegar Úkraínumenn buðu fréttamanni AP í heimsókn í verksmiðjuna þar sem flugskeytin, sem heita Flamingo, eru smíðuð.
Flugskeytið hefur fengið nafnið Flamingo og segja sérfræðingar að hér sé um sannkallað ofurflugskeyti að ræða. Með 3.000 km drægi nær það allt til Moskvu og það hugnast Vladímír Pútín örugglega ekki.
Með þessu langdræga flugskeyti er hægt að skjóta á skotmörk í Moskvu og í stórum hluta vestanverðs Rússlands, til dæmis mikilvæga innviði, olíuhreinsistöðvar og herstöðvar og birgðageymslur.
Margir hafa gert grín að nafni flugskeytisins en Iryna Terekh, tæknistjóri verksmiðjunnar, sem framleiðir flugskeytið, sagði að það þurfi ekki eitthvað hræðandi nafn á flugskeyti sem dregur 3.000 kílómetra. „Aðalmálið er að flugskeytið virki vel,“ sagði hún.
Þróun flugskeytisins tók aðeins níu mánuði.
Volodymyr Zelenskyy, forseti Úkraínu, sagði að tilraunir með flugskeytið hafi gengið vel og þetta sé besta flugskeytið sem Úkraínumenn hafi haft yfir að ráða fram að þessu.
Framleiðsla þess er hafin og markmiðið er að í janúar á næsta ári verði framleiðslan komin upp í um 200 flugskeyti á mánuði.
