Að undanförnu hefur fólk orðið vart við náunga á samfélagsmiðlum sem kallar sig Nicolas. Nicolas fer um landið, tekur myndir af holum og birtir. Hann hefur líka farið og merkt holur með því að setja upp skilti sem á stendur ¡Hola! – og af nógu er að taka.
Sjá einnig: Slær í gegn á samfélagsmiðlum þar sem hann heilsar holum landsins
Í tilkynningu frá Colas kemur fram að í tæpa tvo áratugi hefur allt of litlu fé verið varið til viðhalds og nýframkvæmda á vegakerfi landsins. Viðhaldsskuldin sem hefur safnast upp frá hruni nemur á bilinu 250–300 milljörðum króna, á gengi dagsins í dag. Hefði reglubundnu viðhaldi og eðlilegum endurbótum verið sinnt eins og vera ber síðustu 20 árin, væri þessi upphæð töluvert lægri.
Nicolas ætlar áfram að taka myndir af holum og birta á samfélagsmiðlum í samstarfi við Colas. Þá hafa Colas Ísland, Félag íslenskra bifreiðaeigenda og Loftmyndir ehf. sett upp Holukort þar sem hægt er að sjá allar tilkynningar um holur til FÍB frá árunum 2024 og 2025. Slóðin er map.is/hola
Í sumar holur hefur verið fyllt upp í með möl, aðrar lagaðar til með bráðabirgðamalbiki en enn eru fjölmargir vegir og vegarkaflar illa farnir og beinlínis hættulegir vegfarendum. Með því að tilkynna um holótta vegi þrýstum við á stjórnvöld að finna lausn á vanda vegakerfisins.
Með þessu vonumst við til að vekja athygli á ástandi vega hringinn í kringum landið og um hvetja fólk um leið að tilkynna um holur sem verða á vegi þeirra.
Lögum holurnar!
Slæmir vegir geta skapað hættulegar aðstæður fyrir vegfarendur. Þegar klæðing er orðin slitin eða bikblæðingar verða, þá minnkar gripið á yfirborði vegarins. Bílstjórar verða varir við hálku og geta misst stjórn á bílnum með ófyrirséðum afleiðingum. Þá þarf ekki að fjölyrða um hætturnar sem fylgja því að keyra í holur, sprungur eða skemmdir í vegum, en það getur hæglega valdið því að fólk missi stjórn á bílnum. Fjölmörg óhöpp og slys, jafnvel banaslys, hafa verið rakin beint til ástands vega. Það eru slys sem hugsanlega hefði verið hægt að koma í veg fyrir, að minnsta kosti minnka verulega líkurnar á.
Lausnirnar á vanda vegakerfisins eru í sjálfu sér einfaldar, en þær eru fjárfrekar. Við verðum að stórauka fjárveitingar til vegagerðar, viðhalds og endurbóta til að geta lyft vegakerfinu okkar á hærra plan. Það margborgar sig að fjárfesta í vegunum og halda þeim almennilega við.
Meira malbik, uppfærum og endurbyggjum
Allt of margir vegir í þjóðvegakerfinu eru úreltir, með tilliti til umferðarþunga. Miklu fleiri kafla, þar sem nú er klæðing, þyrfti að malbika. Klæðing þolir ekki ekki meiri umferð en 1500–2000 bíla á sólarhring og enn verr mikla þungaflutninga.
Margir vegir hringinn í kringum landið eru einfaldlega löngu komnir á tíma. Nokkuð stór hluti vegakerfisins var lagður fyrir meira en hálfri öld og burðarlagið fyrir löngu orðið ónýtt. Það þarf að fjárfesta í endurbyggingu, leggja vegi sem standast kröfur samtímans og halda þeim vel við. Þannig og aðeins þannig fáum við örugga og góða vegi sem munu þjóna landsmönnum vel um ókomna tíð.
