Í nýlegu viðtali við NBC sagðist hann vilja að friðarsamningur verði undirritaður. „Við teljum að við séum nærri því og að við munum bjarga mörgum mannslífum,“ sagði hann.
Hann var spurður hvort hann muni styðja lagafrumvarp, sem Lindsey Graham þingmaður Repúblikana, stendur á bak við. Samkvæmt frumvarpinu verða nýjar refsiaðgerðir settar á Rússland og 500% tollur á innflutning frá löndum sem kaupa olíu, gas eða úran frá Rússlandi.
Trump sagði að stuðningur hans við frumvarpið velti á hvort Rússlandi þokist í átt að friði eða ekki.
Lindsey Graham, í samvinnu við Demókratann Richard Blumenthal, kynnti refsiaðgerðapakkann í apríl og hafa þeir síðan aflað stuðnings 72 þingmanna í öldungadeildinni við hann en þar sitja 100 þingmenn.
Graham hefur lýst refsiaðgerðunum sem „beinbrjótandi“ og að þær geti hjálpað Trump við að koma á friði.
Samkvæmt tillögunni verður refsiaðgerðum og tollum blandað saman.
500% tollur verður lagður á innflutning á vörum til Bandaríkjanna frá löndum sem kaupa olíu, gas og úran frá Rússlandi.
Þetta myndi koma illa niður á Evrópu sem kaupir enn mikið af eldsneyti og úrani frá Rússlandi. Það stendur þó til að hætta þeim viðskiptum alfarið innan ekki svo langs tíma.
En lönd á borð við Indland, Kína og Tyrkland myndu einnig finna fyrir 500% tollinum því þau kaupa mikið af olíu frá Rússlandi.
