Í miðborginni var tilkynnt um mann vera að brjóta rúður á hóteli. Að sögn lögreglu reyndist sá vera mjög ölvaður og ekki í ástandi til að vera meðal almennings. Var hann vistaður í fangaklefa.
Lögreglu var svo tilkynnt um konu vera að ráðast á pizzasendil í borginni. Konan reyndist hafa stolið síma starfsmannsins og hafði starfsmaðurinn elt hana. Þá er hún sögð hafa veist að honum með höggum í andlit hans. Konan var í annarlegu ástandi og var vistuð í fangaklefa vegna málsins.
Þá var tilkynnt um mann á hótelherbergi sem væri að ganga berserksgang. Mun hann hafa haft orð á því að hann myndi slást við lögregluna þegar hún myndi koma.
Lögregla mætti á vettvang og ræddi við einstaklinginn sem var í annarlegu ástandi sökum fíkniefna og óútreiknanlegur í hegðun. Í skeyti lögreglu segir að hann hafi verið æstur og rólegur til skiptis en inni í herberginu mátti sjá meint fíkniefni. Hann var handtekinn og fluttur á lögreglustöð þar sem meiri fíkniefni fundust í hans vörslu. Var hann vistaður í fangaklefa vegna málsins.
Á lögreglustöð 3, sem sinnir Breiðholti og Kópavogi, var tilkynnt um mann sem var ber að ofan og með bareflið fyrir utan ónefnt húsnæði. Hann var verulega ölvaður og taldi það vera „mikla köllun hans að vernda húsið í viðræðum við lögreglu“ eins og það er orðað.
Í skeyti lögreglu kemur fram að maðurinn hafi ekki getað lofað því að halda ekki áfram uppteknum hætti. Var hann því handtekinn og vistaður í fangaklefa vegna ástands og brots á vopnalögum.
