Segja má að spennan sé að magnast fyrir þætti Kveiks í kvöld þar sem fjallað verður um ævintýralegar deilur íslenskra auðmanna sem urðu meðal annars til þess að þekktir Íslendingar urðu vikum saman hundeltir og í borg og bý.

RÚV hefur nú hitað upp fyrir þáttinn og afhjúpað að eftir að fyrirspurn barst frá Kveik til lögreglunnar á höfuðborgarsvæðinu vegna málsins hefur einn varðstjóri hjá umferðardeildinni verið leystur undan vinnuskyldu.

Sá mun vera grunaður um að hafa setið um heimili og vinnustaði fólks, elt það og safna um það persónuupplýsingum, samhliða skyldustörfum fyrir lögregluna. Kveikur segir að um sé að ræða háleynilegar njósnaaðgerðir sem lögreglumaðurinn fékk greitt fyrir án vitundar yfirmanna sinna.

Fyrirtækið sem skipulagði njósnirnar var stofnað af tveimur fyrrverandi lögreglumönnum. Þetta fyrirtæki fékk svo varðstjórann til að framkvæma svokallaða skyggingu, eða að sitja um heimili og vinnustaði fólks og skrásetja ferðir þess. Lögreglumaðurinn hafði aðgang að upplýsingakerfi lögreglunnar LÖKE sem hefur að geyma viðkvæmar persónuupplýsingar.

Umræddur varðstjóri er enginn nýgræðingur heldur á að baki áratugaferil hjá lögreglunni þar sem hann hefur meðal annars starfað hjá sérveit ríkislögreglustjóra.

Mál hans er nú komið til ríkissaksóknara sem mun meta hvort um refsiverða háttsemi sé að ræða.

Nánar verður fjallað um málið í Kveik í kvöld.