Bæjarráð Reykjanesbæjar samþykkti á reglubundnum fundi sínum í morgun að sveitarfélagið myndi leita eftir skammtímafjármögnun, með höfuðstól allt að einum milljarði króna, vegna tímabundins lausafjárvanda. Er vandinn til kominn af þeirri ástæðu að í þessum mánuði er byrjað að innheimta fasteignagjöld vegna þessa árs og hægst hefur töluvert á fjárstreymi inn á reikninga sveitarfélagsins síðan innheimtu fasteignagjalda fyrir síðasta ár lauk í nóvember á síðasta ári.
Vegna málsins mætti Regína F. Guðmundsdóttir sviðsstjóri fjármála- og stjórnsýslusviðs á fundinn í morgun og lagði fram tilheyrandi minnisblað.
Bæjarráð Reykjanesbæjar samþykkti í kjölfarið að óska eftir skammtímafjármögnun að höfuðstól allt að 1.000.000.000 króna með lokagjalddaga þann 15. janúar 2026. Einnig samþykkti bæjarráð að óska eftir framlengingu á lánasamningi sem er á gjalddaga 28. febrúar næstkomandi. Það kemur ekki fram í fundargerð bæjarráðs hversu hár höfuðstóll þess lánasamnings er.
Í fundargerðinni segir að þessari skammtímafjármögnun sé ætlað að brúa bil þar til jafnvægi komist á dreifingu fjárstreymis en fasteignagjöld séu innheimt frá febrúar til nóvember ár hvert og komi því fall í fjárstreymi í desember og janúar um 700 milljónir króna.
Ekki er að sjá annað á fundargerðinni en að þetta hafi verið samþykkt af öllum fulltrúum í bæjarráði, bæði minni- og meirihluta.
