Tvö stór fíkniefnamál eru nú til rannsóknar hjá Lögreglunni á höfuðborgarsvæðinu en þar er um að ræða mikinn innflutning á annars vegar hassi og hins vegar kókaínvökva. Efnin voru falin í bílum sem komu með Norrænu til Seyðisfjarðar um miðjan nóvember. Í tilkynningunni segir:

„Tvö umfangsmikil fíkniefnamál eru nú til rannsóknar hjá Lögreglunni á höfuðborgarsvæðinu, en í öðru þeirra var lagt hald á 53 kg af hassi en í hinu 9 lítra af kókaínvökva. Hassið og kókaínvökvinn var falið í sitthvorri bifreiðinni, sem báðar komu til Seyðisfjarðar með farþegaskipinu Norröna um miðjan síðasta mánuð. Bifreiðunum var þá fylgt eftir og síðan voru fjórir handteknir í framhaldinu, þ.e. báðir bílstjórarnir og tveir menn sem veittu varningnum mótttöku.

Um tvö aðskilin mál er að ræða, einn var handtekinn í öðru þeirra og þrír í hinu. Mennirnir eru allir erlendir ríkisborgarar og virðast ekki hafa nein tengsl við Ísland. Þeir hafa allir setið í gæsluvarðhald frá því málin komu upp, en það rennur út í þar næstu viku. Bæði málin eru afrakstur mjög góðrar samvinnu lögregluliðanna á höfuðborgarsvæðinu og Austurlandi og Tollgæslunnar. Embættin nutu jafnframt aðstoðar lögreglunnar á Norðurlandi eystra og sérsveitar ríkislögreglustjóra við aðgerðir í fyrrnefndum málum.“

Einnig eru nefnd til sögunnar þrjú önnur fíkniefnamál á árinu þar sem með góðri samvinnu lögreglu og tollgæslu var lagt hald á mikið magn af efnum, m.a. ketamín og MDMA.

Í lok tilkynningar er fólki leiðbeint um hvernig miðla má upplýsingum um brot til lögreglu:

„Við minnum á upplýsingasíma lögreglu 800 5005. Í hann má hringja nafnlaust til að koma á framfæri upplýsingum um skipulagða brotastarfsemi, eða önnur brot sem fólk hefur vitneskju um.“