Í tilkynningu frá verðlagseftirliti ASÍ kemur fram að verslunin Prís hafi alla tíð síðan hún opnaði þann 17. ágúst á síðasta ári verið með lægsta matvöruverðið í könnunum eftirlitsins.

Í tilkynningunni segir að verslunin hafi verið ódýrust í samanburði verðlagseftirlitsins frá fyrsta degi og verið vel undir verði annarra verslana allan þann tíma. Sem stendur sé Prís um 6 prósent ódýrari en Bónus og Krónan að meðaltali og 10 prósent ódýrari en Nettó.

Segir enn fremur að verðmunur á einstökum vörum geti verið allt að 22-28 prósent milli verslananna.

Verðmunur milli Prís og Krónunnar geti orðið allt að 58 prósent á einstökum vörum.

Um opnun Prís fyrir ári segir í tilkynningunni að þá hafi verið mörg dæmi um verðbreytingar hjá helstu samkeppnisaðilum strax á fyrstu dögum. Þó hafi lítið breyst í stóru myndinni undanfarna mánuði en opnun Prís hafi hins vegar haft ein eftirtektarverð áhrif. Í Krónunni hafi lækkað verð á þeim vörum sem ekki fundust í Bónus þegar Prís mætti til leiks. Þessar breytingar séu vísbending um að annað hvort hafi Krónan haft aðeins hærri verð á þeim vörum sem Krónan og Bónus voru ekki í samkeppni um, eða þá að Krónan hafi frekar treyst sér til að keppa við Prís en við Bónus í ágúst í fyrra.

Verðlag í sumar

Að lokum er í tilkynninguni gerð grein fyrir þróun verðlags nú í sumar. Verðlag á matvöru hafi hækkað um 0,1 prósent milli júní og júlí og verðathuganir fyrri part ágúst bendi til þess að verðlag á dagvöru hafi að mestu staðið í stað milli júlí og ágúst. Sé um nokkurn viðsnúning að ræða frá tímabilinu febrúar til júní þegar meðalhækkunin nam 0,6 prósent.

Verðlag í dagvöru hafi hins vegar hækkað um 0,3 prósent milli júní og júlí ef aðeins séu skoðaðar matar- og drykkjarvörur. Sérstaklega er tekið fram að vörur frá Nóa Síríus hafi haldið áfram að hækka:

„Til dæmis hækkaði 240gr poki af Nóa kroppi um 13% í Bónus milli júní og júlí. Nóa súkkulaðiperlur hækkuðu um 17% í Hagkaup, hvítir og konsúm súkkulaðidropar hækkuðu um 12% í Krónunni og um 13% í Nettó og svo mætti lengi telja.“