Litlu munaði að fjallaleiðsögumaðurinn Einar Rúnar Sigurðsson hefði ekki fengið að sjá 57 ára afmælisdaginn sinn í fyrradag þegar hann var þvingaður út af vegi skammt við Kvísker. Hann segist ekki reiður við ökumanninn en „lestarhegðun“ ferðamanna sé sökudólgurinn.
Einar Rúnar er einn reyndasti fjallaleiðsögumaður landsins og hefur farið í hundruð skipti upp á Hvannadalshnjúk. Hann lenti í óskemmtilegri reynslu á veginum við Kvísker í Öræfum í fyrradag, þegar hann var þvingaður út af veginum.
Var þetta daginn fyrir 57 ára afmælið hans og segist hann heppnin að það endaði ekki verr. Einar Rúnar var að koma frá Höfn í Hornafirði og mætti langri bílalest vestan við Kvísker.
Þar hafi ökumaður hvíts fólksbíls ákveðið að færa sig framar í lestina en komst ekki aftur inn á sinn vegarhelming. Stutt hafi verið á milli bílanna.
Ákvað Einar Rúnar að keyra út af veginum, það hafi verið öruggara en að reyna að hanga uppi á kantinum, hálfur út af og á fullri ferð. Bíllinn sem á móti kom hafi verið alveg inni á hans vegarhelmingi þegar þeir mættust.
„Ég drap á og stökk út og tók mynd af lestinni bruna í burtu,“ segir Einar Rúnar í samtali við DV. Hann hafi verið mjög heppinn. „Heppinn með hvernig svæðið í kringum veginn var slétt. Þokkalega stórir steinar aðeins vestar.“
Einar Rúnar segist hafa verið feginn að vera á Land Rover Defender jeppa. Það hefði kannski farið öðruvísi ef hann hefði verið á Skódanum sínum, að hendast niður af veginum á 70 kílómetra hraða.
Hann segist kenna ökuhegðun ferðamanna almennt á Íslandi um þetta frekar en ökumanni hvíta bílsins sem þvingaði hann út af veginum.
„Ég var ekki einu sinni reiður við ökumann hvíta bílsins,“ segir Einar Rúnar. „Þessi lestarhegðun ferðamanna á Íslandi er sökudólgurinn. Það að þurfa að hanga í rassinum á næsta bíl með 2 metra á milli hvort sem bíllinn á undan keyrir á 60 eða 95. Gerir það að verkum að þeir sem vilja keyra eins og eðlilegt fólk þegar það vill svo til að fremsti bíll er á 60-70 þarf að stofna sér (og mér) í stórhættu til að komast fram úr 100 metra langri lest.“
Spyr hann hvort það væri ekki rétt að láta bílaleigurnar búa til kennsluefni fyrir ferðamenn þar sem tekið væri á hegðun eins og þessari.
