Karlmaður hefur verið dæmdur í fimm mánaða skilorðsbundið fangelsi fyrir blygðunarsemisbrot, hótanir, líkamsárás sem og umferðar- og fíkniefnalagabrot. Dómur féll í málinu þann 22. desember í Héraðsdómi Reykjavíkur.

Maðurinn, Pétur Ómar Pétursson, var sakaður um að hafa þann 31. ágúst árið 2023 klipið annan karlmann endurtekið í síðuna, reynt að fá hann til að taka utan um sig og svo hótað því ítrekað að taka manninn með valdi og hafa mök við hann í endaþarm. Eins hótaði Pétur því að lemja viðkomandi.

Þann 16. júlí 2024 mun Pétur svo hafa veist að ofbeldi að öðrum manni, skallað hann í höfuðið og slegið hann með billjardkjuða í kviðinn. Kjuðinn brotnaði í átökunum. Pétur mun svo hafa lamið manninn með krepptum hnefa í andlitið svo brotaþolinn féll í gólfið. Því næst sló Pétur hann með kjuðanum í bakið þar sem brotaþoli lá varnarlaus á gólfinu. Ofbeldið mátti rekja til þjóðernisuppruna og litarháttar brotaþola.

Loks var Pétur ákærður fyrir umferðar- og fíkniefnalagabrot en hann hafði ítrekað ekið bifreið sviptur ökurétti og óhæfur til að stjórna bifreiðinni örugglega vegna áhrifa ávana- og fíkniefna og eins fundust fíkniefni á honum í tvígang, annars vegar rúmlega 17 grömm af amfetamíni og hins vegar tæp 2 grömm af kókaíni.

Pétur játaði skýlaust sök í málinu og horfði það honum til málsbóta. Hann hafði þó áður verið sviptur ökuréttindum vegna umferðar- og fíkniefnalagabrota og hefði ekki átt rétt á að fá ökuréttindi að nýju fyrr en um mitt ár 2030. Ákæruvaldið krafðist þess að nú yrði hann sviptur ökuréttindum til sex ára frá þeim tíma er síðasta svipting rynni út, en dómara í málinu þótti of íþyngjandi að Pétur gæti aðeins fengið réttindin að nýju árið 2026. Hann var því sviptur ökuréttindum ævilangt frá uppkvaðningu dómsins núna 22. desember, en hægt er að sækja um endurveitingu ökuréttinda 5 árum eftir ævilanga sviptingu. Þar með getur Pétur fengið réttindin að nýju í lok árs 2030. Pétur þarf eins að greiða þolandanum sem hann hótaði að nauðga 400 þúsund krónur í miskabætur.