Í tilkynningu frá Slysavarnafélaginu Landsbjörg sem send var út rétt í þessu kemur fram að vegna galla verði svokallaður Rakettupakki 2 tekinn úr sölu hjá félaginu og þeir pakkar sem þegar hafa verið seldir innkallaðir.

Segir í tilkynningunni að Landsbjörgu hafi í kvöld borist ábendingar um að galli væri í einhverjum rakettum sem seldar hafi verið í Rakettupakka 2. Við prófun hafi komið í ljós að einhverjar þeirra sprungu of snemma.

Því hafi verið tekin sú ákvörðun að taka Rakettupakka 2 úr sölu og kalla inn þá pakka sem hafa verið seldir.

Þau sem hafa keypt Rakettupakka 2 eru hvött til að koma með hann á næsta sölustað og skipta honum út fyrir aðra vöru. Hægt verður að skipta út pakkanum á morgun þar til sölustaðir loka, sem og á opnunartíma fyrir þrettándann.

Segir að lokum að í tilkynningunni að Slysavarnafélaginu Landsbjörg þyki miður að viðskiptavinir verði fyrir óþægindum vegna þessa, en öryggi okkar allra þurfi alltaf að vera í fyrirrúmi.