Því var haldið fram í gær að smáforritið safnaði upplýsingum um notendur sína sem síðan væru sendar til Ísraelsmanna. Engar sannanir voru lagðar fram vegna þessa en forsvarsmenn WhatsApp voru fljótir að bregðast við og lýsa áhyggjum af þessum „fölsku upplýsingum“ sem ættu sér enga stoð í raunveruleikanum.
Bentu forsvarsmenn WhatsApp á það að engar upplýsingar um notendur – innihald skilaboða eða staðsetningu notenda – væru sendar frá fyrirtækinu. Að halda þessu fram væri áhyggjuefni á tímum þar sem fólk þarf hvað mest á appinu að halda.
WhatsApp leggur mikið upp úr persónuvernd notenda og notar það sem kallað er dulkóðun frá enda til enda (e. end-to-end encyption). Geta aðeins sendendur og móttakendur skilaboðanna séð þau.
WhatsApp er eitt vinsælasta smáforritið í Íran og reiða margir íbúar sig þar á forritið til að eiga samskipti við aðra.
