Fæðinga- og kvensjúkdómalæknirinn Ebba Margrét Magnúsdóttir greindist með Parkinson-sjúkdóminn fyrir fimm árum síðan en hana hafði þá grunað þetta í nokkurn tíma. Hún átti þó erfitt með að horfast í augu við greininguna og vildi sem minnst um hana ræða. Nú hefur hún ákveðið að ljúka þessum fimm ára feluleik en frábiður sér alla vorkunn.

Ebba skrifar í grein sem birtist hjá Vísi í dag að lengi hafi hún ekki einu sinni getað sagt orðið Parkinson. Hún kallaði þetta bara „P-dæmið“.

„Ég vildi ekki tala um það eða að neinn nema mínir nánustu hefðu vitneskju um þessi örlög mín,“ skrifar Edda og bendir á að það hafi verið töluvert áfall að greinast aðeins 52 ára gömul með sjúkdóminn og þurfa að endurskipuleggja framtíðaráformin. Edda hafði fyrir greiningu fundið fyrir skjálfta í nokkurn tíma. Innst inni vissi hún hvað amaði að henni en það sé erfitt að horfast í augu við hrörnunarsjúkdóm þegar maður er enn í fullu fjöri.

„En hvernig tekst kona á besta aldri við slík örlög þegar hulstrið er skaddað en hugurinn skarpur? Öflug kona á framabraut ákveður að fara í felur til að tryggja að skjólstæðingar hennar hlaupi ekki á brott.“

Fyrir ári síðan greindist eiginmaður hennar svo með krabbamein, en hann tókst á við sín veikindi með öðrum hætti en Ebba. Hann deildi veikindum sínum með öllum sem heyra vildu. „Hefur ekkert að fela og tekst á við sín örlög með reisn. En ég var ekki tilbúin og gat ekki sagt orðið. Var kannski ekki tilbúin að sætta mig við þessi döpru örlög.“

Ebba segir að nú sé komið að þeim kaflaskilum að hún er hætt að fela sig: „En nú er komið að kaflaskilum, èg er hætt í feluleik. Fimm ár í þeim leik eru meira en nóg.“

Hún ætlar að vera bjartsýn um veikindi sín og: „njóta hvers dags og þakka fyrir allt það góða sem lífið hefur gefið okkur. Við viljum ekki vorkum og við erum ekki hætt að skoða konur, skrifa pistla og skíra, gifta og jarða þó að pakkatilboðið skurður og skírn sé ekki lengur í boði. Þökkum fallegar hugsanir og fyrirbænir.“