Móðir verslaði í matinn fyrir fjölskylduna og fannst verðmiðinn á körfunni orðinn ansi hár. Hún er greinilega ekki sú eina sem er komin með nóg af hækkandi verðlagi á matvöru hér á landi en lífleg umræða skapaðist undir færslu sem hún birti í vinsæla Facebook-hópnum Vertu á verði – Eftirlit með verðlagi.

DV ræddi við konuna sem sagðist blöskra verðlagið á Íslandi í dag og að það væri skiljanlegt að margir ná ekki endum saman.

Konan fór í Bónus um Hvítasunnuhelgina og keypti ýmislegt eins og pasta og frosna ávexti. Dýrast voru pakkar af kjúklingabringum, en hún vildi gera vel við börnin og elda eina hátíðarmáltíð um Hvítasunnuna. Karfan kostaði 44 þúsund krónur.

„Það er nauðsynlegt að vekja athygli á þessu, matarinnkaup eru að fara með mörg heimili, auk þess hafa lánin hækkað svo mikið að það er ekki hægt að ná endum saman á venjulegum launum,“ segir móðirin í samtali við DV.

Fjölmargir hafa skrifað undir færsluna og tekið undir með henni, að verð á matvöru hérlendis væri orðið of hátt.

„Sammála því, verð á mat og dagvöru þykir út í hött. og verðmiðinn á þessari matarkörfu ber þess vel merki,“ sagði einn meðlimur í hópnum.

„Þetta er svo sorglegt. Áður var haldið fram að þegar vélar myndu vinna mest alla vinnuna þa myndi matarverð hrynja. Aldrei hafi færri handtök verið gerð þegar kemur að mat. En ekki skilst það til neytenda. Efstu 10% hinsvegar aldrei haft það betra,“ sagði annar.

Einn sagði meðallaun og verðlag ekki koma heim og saman: „Þetta ætti að kosta 8-10 þúsund miðað við laun og fleira.“

„Græðgissýkin tröllríður öllu og öllum,“ sagði annar.

Einn hópmeðlimur sagði stöðuna úti á landi vera enn verri. „Getur þá rétt ímyndað þér hvað sama karfa myndi kosta hjá Kjörbúðinni, einu versluninni á mínu svæði. Um 80-90 mínúta keyrsla (hvora leið) til að komast í lágvöruverslun fyrir mig (bý þó rétt við þjóðveg 1).“