Fimm heppnir miðaeigendur hlutu eina milljón hver þegar dregið var í útdrætti Happdrættis Háskólans í kvöld. Þrjár ungar konur voru á meðal þeirra heppnu og ein þeirra á von á barni á næstu mánuðum. Hún var að vonum glöð og sagði að það kæmi sér heldur betur vel fyrir stækkandi fjölskyldu að fá eina skattfrjálsa milljón í vasann.
3.334 heppnir vinningshafar skiptu um 130 milljónum króna á milli sín. Auk þeirra fimm sem hlutu milljón á mann voru sextán miðaeigendur sem unnu 500 þúsund krónur hver og 374 fengu vinninga á bilinu 100 til 250 þúsund krónur.
Í tilkynningu frá Happdrætti Háskólans óskar happdrættið öllum vinningshöfum innilega til hamingju og þakkar stuðninginn í gegnum tíðina. Með kaupum á miða í Happdrætti Háskólans stuðla miðaeigendur að áframhaldandi uppbyggingu Háskóla Íslands og tryggja Íslendingum blómlegt háskólasamfélag. Allur hagnaður af rekstri HHÍ fer í uppbyggingu Háskóla Íslands og hafa 25 byggingar risið fyrir happdrættisfé.
