Orri Harðarson, tónlistarmaður og rithöfundur, er látinn, 52 ára að aldri.
Orri lést á Heilbrigðisstofnun Vesturlands á Akranesi 7. júní síðastliðinn, banamein hans var krabbamein sem hann greindist með í byrjun árs.
Orri skilur eftir sig tvær dætur, Karólínu, 14 ára og Birgittu Ósk, 11 ára.
Orri fæddist á Akranesi 12. desember 1972 og ólst þar upp. Foreldrar hans eru Hörður Ó. Helgason, fyrrverandi skólameistari og knattspyrnuþjálfari, og Sigrún Sigurðardóttir, fyrrverandi læknaritari.
Eftir Orra liggja fimm sólóplötur og þrjár bækur. Orri gaf út sína fyrstu plötu tvítugur að aldri. Orri hlaut ýmsar viðurkenningar fyrir verk sín, meðal annars Íslensku tónlistarverðlaunin. Árið 2017 var hann útnefndur bæjarlistamaður Akureyrar.
Árið 2008 sendi Orri frá sér sína fyrstu bók, Alkasamfélagið, og hlaut fyrir hana Fræðslu- og vísindaviðurkenningu Siðmenntar. Árið 2014 kom út skáldsagan Stundarfró, og tveimur árum síðar Endurfundir.
Í febrúar héldu vinir og ættingjar Orra styrktartónleika fyrir hann og dætur hans.
Sjá einnig: Einstök Orrahríð – Ást í lofti og ryk í augum á styrktartónleikum á Skaganum
