Michal Gabriš lést í sjósundi út af Örfirisey í lok maí. Michal var 27 ára gamall og frá Slóvakíu.

Sjá einnig: Karlmaður fannst látinn í sjónum út af Örfirisey

Michal kom hingað til lands 24. apríl í það sem hann kallaði í færslu á Facebook „Stærsta ævintýri lífs míns.“ Framundan var 1300 km ferðalag hringinn í kringum Ísland á hlaupahjóli. Michal var duglegur að skrifa færslur um ferðalagið og birta myndir. Ferðalaginu lauk 8. maí í Reykjavík á sama stað og það hófst, við Hallgrímskirkju.

„Ég veit nú þegar leiðina til Reykjavíkur, ég er ekki að flýta mér. Ég kem til bæjarins um klukkan þrjú síðdegis, kjörinn tími. Ég lýk ferð minni við þekkta kirkju í miðbænum. Og ég hitti þar fólk sem hefur séð mig á leiðinni, þau óku um Ísland í 13 daga. Og ég í 13 daga á hlaupahjóli. Og við hittumst á sama stað, á sama tíma. Heimurinn er lítill, en upplifanirnar eru miklar. Loksins kominn aftur til Reykjavíkur. Hið ómögulega er orðið að veruleika. Einn stór draumur sem ég bjó yfir hefur ræst á Íslandi.“

Þann 29. maí um hálffimmleytið barst tilkynning um hvarf Michal, hann var í sjósundi og er talinn hafa örmagnast. Hans var leitað fram á kvöld, og hófst leit aftur um hádegi daginn eftir. Michal fannst látinn í sjónum út af Örfirisey.