Iceland – Tips for travelers er hópur á Facebook sem telur um 180 þúsund meðlimi og þar birtast jafnan færslur frá fólki sem deilir sniðugum ráðum áður en haldið er til Íslands í frí.
Í gær birtist ein athyglisverð færsla frá einstaklingi sem flaug hingað til lands með bandaríska flugfélaginu Delta fyrir skemmstu.
„Þetta kann að hljóma galið en er eitthvað sem hefur reynst frábærlega og sparað okkur stórfé í mat og drykk,“ segir í byrjun færslunnar.
Viðkomandi virðist hafa ferðast til landsins með tveimur öðrum, hugsanlega maka sínum og barni, og gátu þau innritað tvær töskur í flugið. Þar sem þau töldu sig ekki þurfa tvær töskur brugðu þau á það ráð að taka með sér eina tösku og nota hitt plássið undir kælibox sem búið var að fylla af mat.
„Þar á meðal jarðarberjasultu og hnetusmjöri, ramensúpum, tilbúnum indverskum réttum frá Tasty Bite og forsoðnum brúnum hrísgrjónum og kínóa,“ segir í færslunni. Kæliboxinu var svo lokað kyrfilega og það svo tékkað inn í flugið með farangrinum.
„Við höfum bara þurft að kaupa ávexti, grænmeti, mjólkurvörur og prosecco til að nota með Aperolinu sem við keyptum í fríhöfninni áður en við lögðum af stað frá Bandaríkjunum,“ segir í færslunni. Viðkomandi bætir svo við að þau hafi heitið því að kaupa einungis eina máltíð á dag á veitingastað svo það sé „ekki eins sárt að eyða 80 dollurum í pizzu fyrir þrjá“.
Færslan vakti töluverða athygli en margir voru á því að þetta væri kannski aðeins of langt gengið, Ísland væri ekki svona rosalega dýrt.
„Hvernig hefur fólk efni á að borða heima hjá sér ef það getur ekki leyft sér að borða þegar það er í fríi,“ spurði einn. „Sniðug hugmynd en eitt af því skemmtilegasta sem ég geri þegar ég fer í frí til annarra landa er að kynnast matarkúltúrnum,“ sagði annar.
„Guð minn góður, ég myndi nú bara safna peningum aðeins lengur í stað þess að ferðast með fullt kælibox af mat. Það er ekki svo dýrt hérna, farðu bara í Bónus, Krónuna eða Prís og verslaðu inn þar,“ sagði ein kona í athugasemd sinni.
