Landsnet hefur sett upp tilkynningaskilti í öllum starfsstöðvum sínum þar sem greint er frá nýrri uppljóstrararás, öðru nafni „Whistle Blower“ kerfi, fyrir trúnaðartilkynningar hjá Landsneti. Er starfsfólk og aðrir hvattir til að nýta sér kerfið til að tilkynna um lögbrot og aðra óásættanlega háttsemi.

Um er að ræða vettvang fyrir nafnlausar trúnaðarupplýsingar. Segir að kerfinu sé ætlað að draga fram mál sem annars hefðu ekki komið í ljós.

Nýlega var skipt um stjórn Landsnets og vaknaði hjá DV sú spurning hvort verkefnið væri til merkis um áherslubreytingu í starfseminni. Svo er ekki en DV fékk eftirfarandi svar frá upplýsingasviði fyrirtækisins:

„Tilgangurinn er að gera starfsfólki Landsnets eða utanaðkomandi aðilum kleift að tilkynna um meint misferli, lögbrot eða aðra ámælisverða háttsemi sem starfsfólk Landsnets, stjórnendur, stjórnarmenn eða birgjar kunna að hafa framið.

Við höfum lengi verið með sambærilegt kerfi fyrir starfsfólk, en ákváðum að gera það aðgengilegt fyrir alla á síðasta ári. Þetta ferli og kerfi er því ekki tengt nýrri stjórn eða breyttum vinnubrögðum, heldur almennt góðum og gagnsæjum vinnubrögðum sem við viljum viðhafa hjá okkur.  

Kerfið tryggir nafnleynd fyrir þá aðila sem vilja tilkynna um meint misferli í stað þess að nýta hefðbundnar samskiptaleiðir. Gerð er krafa um slíka ferla í sjálfbærnistöðlum og einnig er eðlilegt að tryggja örugga innleiðingu á lögum um vernd uppljóstrara, nr. 40/2020.  

Í lögunum er kveðið á að í fyrirtækjum eða á öðrum vinnustöðum þar sem eru 50 starfsmenn eða fleiri að jafnaði á ársgrundvelli skal atvinnurekandi í samráði við starfsmenn setja reglur um verklag við uppljóstrun starfsmanna um lögbrot eða aðra ámælisverða háttsemi. Þá vil ég einnig benda þér á þær upplýsingar sem eru að finna á vef Landsnets þ.m.t. upplýsingar um kerfið sjálft.

Það er rétt að benda á að Landsnet er ekki eina fyrirtækið með slíkt kerfi. Fjölmörg fyrirtæki hafa þannig innleitt sambærilega ferla og kerfi.“