Hafnarfjarðarbær mun borga Rio Tinto rúmlega 26 milljónir króna vegna hluta lands sem Vegagerðin tók yfir til að gera tvöföldun Reykjanesbrautar.

Hafnarfjarðarbær og Rio Tinto, sem rekur álverið í Straumsvík, hafa náð samkomulagi um bætur vegna landsins. Var það samþykkt á fundi bæjarráðs í dag og vísað til samþykkt bæjarstjórnar.

Þann 24. október árið 2004 keypti Alcan á Íslandi (nú Rio Tinto) land af Hafnarfjarðarkaupstað sunnan við athafnasvæði álversins. Alls 51,95 hektara lands, eða 519.500 fermetra.

Vegna framkvæmda og undirbúnings við tvöföldun Reykjanesbrautar tók Vegagerðin yfir 85.259 fermetra af landinu árið 2023. Þar af voru 19.612 fermetrar undir eldra vegstæði.

Við ákvörðun bóta til Rio Tinto vegna yfirtökunnar voru þessir fermetrar dregnir frá. Það er vegna þess að Vegagerðin hafði ekki gefið samþykki sitt fyrir sölunni árið 2004. Vegagerðin bætti því aðeins 65.647 fermetra.

„Undirritaðir aðilar eru sammála um að Hafnarfjarðarkaupstaður bæti Rio Tinto þá 19.612 fermetra af landinu sem ekki voru bættir af Vegagerðinni og við ákvörðun bótafjárhæðar verði miðað við núvirtu kaupverði per fermeter samkvæmt ofangreindum kaupsamningi frá árinu 2004,“ segir í samkomulaginu.

Gera þetta alls 26.054.604 krónur. En eftir undirritun getur hvorugur aðili átt kröfu á hendur hinum vegna þess lands sem Vegagerðin hefur tekið yfir vegna framkvæmdanna.