Kristinn Ásgeir Gylfason lögfræðingur hefur stofnað fyrirtækið Scaling Legal sem miðar að því að veita sprotafyrirtækjum sérsniðna lögfræðiþjónustu. Þessi ráðgjafaþjónusta er sérstaklega hönnuð fyrir fyrirtæki sem ekki hafa þörf fyrir eða getu til að ráða lögfræðing í fullt starf.

Kristinn starfaði áður í fimm ár hjá Sidekick Health en þar öðlaðist Kristinn víðtæka reynslu í lögfræðilegum málefnum og persónuverndarmálum. Auk þess hefur hann haldið utan um samningagerð, stjórnun hluthafaskráa, kaupréttarplön, undirbúning stjórnarfunda og önnur verkefni. Kristinn starfaði einnig um árabil sem bílablaðamaður, eins og segir í tilkynningu..

„Scaling Legal leggur áherslu á að veita sprotafyrirtækjum upplifun sem líkist því að hafa innanhúss lögfræðing. Þjónustan felur í sér djúpa innsýn í rekstur og starfsemi hvers viðskiptavinar, sem gerir það mögulegt að veita einstaklingsmiðaða ráðgjöf án aukakostnaðar fyrir að læra inn á fyrirtækið. Þetta tryggir að fyrirtækin séu vel undirbúin fyrir fjármögnunarumferðir og vöxt.

Fyrirtæki geta valið um sveigjanlegar greiðsluleiðir, þar á meðal tímavinnu, fast verð fyrir tiltekin verkefni eða tímakörfusamning sem safnast upp ef hann er ekki fullnýttur,“ segir Kristinn.

Með stofnun Scaling Legal stefnir Kristinn að því að styrkja sprotafyrirtæki með því að veita þeim aðgang að gæða lögfræðiþjónustu sem er aðlöguð að þeirra sérstökum þörfum og stuðlar að öruggum og skilvirkum vexti þeirra.