Í Facebook-hópnum Vertu á verði – eftirlit með verðlagi sem verðlagseftirlit ASÍ heldur úti birtast reglulega ábendingar um hátt verðlag, misgóða þjónustu og margt fleira frá íslenskum neytendum.

Hátt verðlag á kaffihúsum á við um margar færslur í hópnum og það á einnig við um þessa. En það er ekki nóg með að verðið sé hátt að mati neytandans, heldur var þjónustan hæg og lög um aðbúnað og hollustuhætti mögulega þverbrotin.

„Ég, sambýliskona og barnabarn fórum á Bakabaka á horni Bankastrætis og Lækjargötu. Við fengum okkur 2 Cappuccino, eitt croisant, einn snúð og eina súkkulaðibitaköku. Fyrir þetta greiddum við Kr. 5.270,- Það fór framhjá okkur að það er dýrara að sitja inni en taka með – en mér er samt sama – að snúður, Croisant eða súkkulaðibitakaka kosti 1200kr. stk. er rán,“ segir maðurinn.

Hann tekur einnig fram að ekkert af bakkelsinu hafi smakkast eins og að það væri bakað sama dag.

„Snúðurinn var líka mun minni en t.d. hjá Brauð&co og súkkulaðibitakakan sem var líka fremur smá. Croisantið var í hefðbundinni stærð.“

Þjónustan gekk einnig hægt og komu veitingarnar ekki allar á sama tíma.

„Við biðum heillengi þar til bakkelsið kom – og en lengur eftir kaffinu þannig að við borðuðum bakkelsið með vatnsglasi og drukkum svo kaffið 20 mín seinna. Þjónustan var verulega hæg enda einn erlendur starfsmaður að afgreiða öll borð, þreyttur og önugur á meðan hinn starfsmaðurinn gerði allt annað.

Ég tók líka eftir því að starfsmaðurinn sem var að afgreiða bakkelsi út úr húsi var með klassískan bláan gúmmíhanska á annarri hendi – þessa sömu hönd notaði hann svo til að strjúka sér um nefið, gefa til baka og afgreiða bakkelsið…“