Lögreglan á höfuðborgarsvæðinu sendi út tilkynningu í morgun þar sem ökumenn voru varaðir við fjölmörgum holum í malbikuðum vegum sem hafa skemmt bíla víða um borgina um helgina. Í kjölfar þess að þíða tók hafa líkurnar á þessari holumyndun aukist og miðað við fjölda tjónatilkynninga hafa þær verið með svakalegra móti.

Í áðurnefndri tilkynningu frá lögreglu var minnst á þrjár skæðar holur sem ollu tjóni á að minnsta kosti 21 bifreið.

Ein af þessum holum myndaðist á hringtorgi á Vesturlandsvegi þar sem keyrt er inn í Helgafellsland í Mosfellsbæ.

Mikil umræða hefur skapast um málið á íbúasíðu Mosfellsbæjar þar sem fjölmargir íbúar greina frá því að þeir hafi lent í tjóni á hringtorginu. Kemur fram að líklega hafi á annan tug bíla orðið fyrir skemmdum vegna holunnar.

Talsverð röð af tjónuðum bílum hafi myndast við hringtorgið, eins og neðangreind mynd sýnir, og hafi einn umhyggjusamur ökumaður tekið sig til og lagt um tíma fyrir framan holuna til þess að forða öðrum frá sambærilegum óhöppum. „Þakka innilega bílstjóranum sem lagði fyrir holuna til að passa að aðrir lentu ekki i henni. Það hefur 100% bjargað mér og mínum bíl,“ skrifaði einn þakklátur vegfarandi.

Þá eru margir íbúar ósáttir við svifasein viðbrögð Vegagerðarinnar í málinu. Er greint frá því að tilkynnt hafi verið um holuna um kl.16 í gær en Vegagerðin látið um 2 klukkustundir líða áður en brugðist var við. „Ég var einn af þeim sem lenti í þessari risastóru holu áður en það var fyllt upp í hana. Dekkið er handónýtt og ég veit ekki hvort það er meira tjón. Það er ömurlegt ef það var löngu búið að tilkynna þetta því ég keyri þarna kl. 17:50,“ segir annar ökumaður sem veitti DV góðfúslegt leyfi til að birta ofangreindar myndir.

Fram kemur að Vegagerðin hafi mætt á svæðið upp úr kl.18 og lagfært holuna.