Kona á fertugsaldri hefur stefnt konu þrítugsaldri til skilnaðar. Telur hún eiginkonu sína hafa notað sig til þess að fá heimild til að dvelja í Evrópu. Skömmu eftir hjónabandið hafi hún haldið fram hjá henni.
Báðar konurnar eru fæddar í Kólumbíu. Samkvæmt stefnunni flutti hin eldri til Íslands árið 2009 og öðlaðist íslenskan ríkisborgararétt árið 2016. Hún á eitt barn úr fyrra sambandi sem er jafn framt íslenskur ríkisborgari.
Hin eldri kynntist þeirri yngri þegar hún var í ferðalagi í Kólumbíu. Þær héldu sambandinu áfram og hin eldri varð ástfangin af þeirri yngri. Í desembermánuði árið 2022 giftust þær hjá Sýslumanninum á höfuðborgarsvæðinu. Í sama mánuði sóttu þær um dvalarleyfi fyrir þá yngri og var það veitt til bráðabirgða á meðan mál hennar var í vinnslu.
Skömmu eftir þessa gjörninga komst hin eldri hins vegar að því að hin yngri hefði verið henni ótrú. Hún væri að hitta annan aðila og væri að stunda framhjáhald.
Í lok árs 2022, örfáum vikum eftir giftinguna, fór hin yngri frá Íslandi án þess að láta eiginkonu sína vita. Sagði hún hins vegar tengdamóður sinni að hún ætlaði til Spánar og þaðan til Kólumbíu.
Í stefnunni segir að hin eldri telji að giftingin hefði verið til málamynda og að hún hafi verið notuð, fyrir þá yngri til þess að fá heimild til að dvelja í Evrópu. Hin eldri hafi reynt að finna hina yngri til þess að fá lögskilnað en það hafi ekki gengið eftir. Segir að hin eldri viti ekkert hvar eiginkona sín sé niðurkomin eða haldi heimili. Hún hafi ekki neinn annan kost en að höfða mál til lögskilnaðar.
Reyndi hún að fá stefnuna birta á það heimilisfang sem hin yngri bjó í í Kólumbíu þegar þær kynntust. En kólumbíska ríkið heldur ekki úti þjóðskrá líkt og hið íslenska og því ekki hægt að fá liðsinni þaðan.
Hin eldri segist í stefnunni ekki gera neinar fjárkröfur á þá yngri. Þær hafi aldrei verið með sameiginlegan fjárhag og hvorugar þeirra eigi nokkrar eignir.
Með fyrirkalli er hinni yngri gert að mæta í Héraðsdóm Reykjavíkur 5. nóvember næstkomandi. Ef ekki verður mætt af hennar hálfu má búast við að útivistardómur gangi í málinu.
