Kristrún Frostadóttir, formaður Samfylkingarinnar, mun hitta þær Þorgerði Katrínu Gunnarsdóttur, formann Viðreisnar, og Ingu Sæland, formann Flokks fólksins, á Alþingi klukkan 15 í dag þar sem reikna má með að formlegar viðræður um myndun nýrrar ríkisstjórnar fari af stað.
Stefán segir á Facebook-síðu sinni að margir hafi velt fyrir sér hvort Flokkur fólksins sé hægri eða vinstri flokkur. Bendir hann á að rótin að þeirri óvissu séu þau klókindi Ingu Sæland að neita að skilgreina flokkinn á hægri-vinstri ásnum og nokkuð ákveðin afstaða í innflytjendamálum.
„En þegar nánar er skoðað blasir við að flokkur sem er stofnaður til að draga stórlega úr fátækt og bæta hag lífeyrisþega og lágtekjufólks almennt er ekkert annað en „velferðarflokkur“. Raunar velferðarflokkur „par excellence“! Hann hefur einnig langmest fylgi meðal lágtekjuhópa, sem áður fylgdu að mestu leyti klassískum jafnaðar- og velferðarflokkum,” segir Stefán og bætir við að að því leyti ætti að vera auðvelt að stilla saman Samfylkinguna og Flokk fólksins í ríkisstjórn.
„Viðreisn gefur sig einnig út fyrir að vera velferðarflokkur að hluta (sbr. slagorðið „Hægri hagstjórn – vinstri velferð“). Þar er samstarfið spurning um vægi hægri og vinstri áherslnanna. Nú er skýrt ákall frá kjósendum um alvöru lagfæringar á velferðarmálum þjóðarinnar,” segir Stefán sem er bjartsýnn á að það takist að landa stjórnarsáttmála.
„Með snjalla samningamenn innanborðs, eins og Ragnar Þór hjá Flokki fólksins, Dag B. Eggertsson og fyrrverandi forseta ASÍ hjá Samfylkingunni og fyrrverandi ríkissáttasemjara í liði Viðreisnar þá væri saga til næsta bæjar ef ekki tækist að ná saman um samstarf Samfylkingar, Viðreisnar og Flokks fólksins.”
