Landsréttur staðfesti á fimmtudag fangelsisdóm yfir Heiðari Þór Guðmundssyni sem héraðsdómur dæmdi í fyrra í 20 mánaða fangelsi og svipti ökurétti ævilangt.

Heiðar var ákærður fyrir fíkniefnalagabrot, fyrir að hafa haft kannabisefni og amfetamín í fórum sínum, og í einu tilviki MDMA. Einnig var hann ákærður fyrir að hafa haft í vörslu sinni á heimili sínu frammistöðubætandi efni í sölu- og dreifingarskyni.

Einnig var hann ákærður fyrir að hafa ekið bíl, sviptur ökurétti, undir áhrifum amfetamíns og annarra efna.

Hann var einnig ákærður fyrir brot á vopnalögum, fyrir að hafa haft kaststjörnu í fórum sínum. Vopnið, sem og fíkniefnin og lyfin, fundust við húsleit á heimili Heiðars.

Var hann sakfelldur í öllum ákæruliðum.

Fyrir Landsrétti tefldi Heiðar fram þeirri vörn að hann sé greindur með ADHD og taki því lyfið Elvane. Lagði hann fram gögn því til stuðnings. Í dómi Landsréttar segir að þegar lögregla hafði afskipti af Heiðari við akstur þann 1. október 2021 hafi hann ekki framvísað læknisvottorði um að hann væri haldinn sjúkdómi sem gerði honum nauðsynlegt að neyta þeirra efna sem kynnu að finnast í blóði hans. Af þeim sökum er ekki fallist á þessar varnir hans.

Landsréttur hefur því staðfest 20 mánaða fangelsisdóm Heiðars og er ekki talin ástæða til að skilorðsbinda refsinguna. Dóminn má lesa hér.